Husi Mornese ba vida loroloron nian

Tinan 140 istória lulik nian, husi Mornese ba komunidade sira, ba mundu.

Tempu maravilla nian, kontemplasaun nian no fekundidade misionária nian.

Istória ida ne’ebé haree nu’udar mahorik Maromak nian no liberdade umana, domin no frajilidade,

aten-barani no laran-taridu, grasa no salan, naroman no nakukun.

 

 

Mehi ida ne’ebé realiza iha tempu…

Mehi nafatin sai dimensaun familiár ida ba profeta sira, ba eroi sira, ba fundadór sira, ba santu sira. Husi nia maka sira foti orientasaun/diresaun no  konfiansa ba posibilidade kona-ba sira ninia hahalok loroloron nian. Ema sira ne’ebé sériu ho sira-nia mehi nafatin prontu atu selu presu ne’ebé fidelidade ba mehi ne’e husu no atu haka’as an ho seriedade ba sira-nia realizasaun. Nune’e mak akontese ho Don Bosco!

Mehi mak uluknanai operasaun ida ne’ebé soi Espíritu Santu nu’udar hun, prezente husi leten, tuir direitu fó ba sira ne’ebé sai disponivel ba Nia.

Iha ha’u-nia istória loroloron nian, iha ne’e no agora, maka realiza Maromak nia mehi.

 

• Loroloron Maromak bolu ita ba domin foun ida (kf art. 103). Nia hafoun iha ita ida-idak ninia Aliansa domin nian no hein resposta ida livre no fiél. Ida-ne’ebé fo buat hotu mai ita, bele husu maka’as husi ita!

Moris lorloron mak espasu iha-ne’ebé Maromak hasoru ita, bolu ita no hafoun ita ho ninia domin. Nune’e nia sai espasu ksolok no hahín nian. Nia hein husi ita resposta ida ne’ebé livre ba beibeik, loos, fiél. Iha ne’e maka realiza ksolok no fekundidade ita-nia misaun nian.

 

• Moris tuir karizma implika prosesu vitál ho dimensaun rua: ”hakohak entrega ida”, basá karizma la’ós buat ruma ema inventa iha époka ida-idak, maibé simu nia, asimila nia, testemuña nia. Hafoin, implika hariku ba beibeik sasimuk ne’e liuhusi moris pesoál no konfrontu ho ezijénsia evanjélika no kulturál sira (kf Progetto Formativo, p. 15).

Karizma dezenvolve, sai kle’an, inkultura iha tempu no espasu. Ita hetan nia nu’udar kódigu iha testu Konstituisaun nian no iha esperiénsia konkreta iha sira ne’ebé asume no husik nia forma sira.  Ita idaidak soi ninia esperiénsia konkreta loroloron nian, hakerek pájina sira istória Institutu nian ne’ebé laiha ema ida bele hakerek iha nia fatin. Ohin-loron, iha ita ida-idak no iha ita-nia komunidade sira mak Fundadór sira moris hikas no atualiza karizma. Iha ha’u-nia fidelidade ba Regra moris nian, ha’u esprime ha’u-nia domin iha ba Don Bosco no ba Maria Mazzarello.

 

• Ho sinseridade ha’u husu ba ha’u-nia an: Sá loos ha’u-nia relasaun ho Konstituisaun sira? Ha’u konsidera sira nu’udar regulamentasaun ida esteril no folin-laek? Ha’u sente responsabilidade atu hakle’an no pratika sira?
• Konstituisaun sira sai mai ita mediasaun ida Maromak nia projetu nian, dalan evanjéliku priviléjiu nian no husi nia, iha moris loroloron, ita hasoru malu ho Kristu no esprime ba nIa domin ida fidelidade nian.

Hanesan ita lee iha Dekretu aprovasaun nian: «Figlie di Maria Ausiliatrice hanoin nafatin S. Giovanni Bosco nia afirmasaun katak observánsia ba Konstituisaun sira garante kumprimentu Maromak nia hakaran, espíritu salezianu nia vitalidade no Institutu nia unidade».

 

• Ita horik iha sosiedade ida iha-ne’ebé individualizmu hetok afirma an ba beibeik no ita la imune/livre husi ninia influénsia. Tanba ne’e, vantajozu atu rekupera nafatin ita-nia identidade ne’ebé ita profesa, moris tuir, fó sasin. Halo di’ak mai ita atu foti konxiénsia klara liután kona-ba Institutu iha Maromak nia planu no iha ninia realizasaun istórika ho modu konkretu iha kontinente oioin.

Maski ita haree distánsia ida iha realizasaun konkreta, importante deskobre filafali karizma, fahe ba malu memória komún ida, sente an rasik nu’udar parte moris no responsavel ba istória ida ne’ebe tau abut iha pasadu, esprime an iha prezente no projeta an iha fututu.

 

• Iha kultura ida ne’ebé, enjerál, rejeita regra no dixiplina, ita hakarak asimila ho modu kle’an liután Konstituisaun sira nu’udar paktu ita-nia Aliansa nian ho Maromak. Ema ohin-loron husu beibeik: «Sala iha ne’ebé se halo ida-ne’e?». Sira lakohi rona liafuan: «ó tenke!» ka «ó la bele» ne’ebé halo sira laran nakali liu. Nu’udar konsekuénsia sira mós la rona liafuan: «ha’u hili imi», «ha’u hadomi ó ho domin rohan-laek», «ó kamurak tebes iha ha’u nia matan», «ó pertense mai ha’u», ne’ebé fó sentidu no ksolok ba vida.

Ita presiza toman liután ho Maromak nia estilu: «Ha’u halo ida-ne’e no ida-ne’ebá ba ó… oras-ne’e ó…» (kf Es 19, 3-6). Ita maka Maromak nia oan sira, nune’e ita tenke komporta an nu’udar oan (kf Rm 8, Gal 5). Husi indikativu mai imperativu, husi don mai kompromisu.

 

• «Ha’u mak fihir imi, hodi haruka imi ba atu ba fó fuan, no imi-nia fuan hela ba nafatin» (Jo 15,16). Ne’e maka sitasaun dahuluk husi sitasaun bíblika 19 iha ita-nia Konstituisaun laran. Ida-ne’ebé hili no bolu ita hein fuan ne’ebé dura. Keta husik akontese mai ita hanesan ai-figeira esteril, ne’ebé Na’i hato’o liafuan todan sira-ne’e ba nia: «Tinan tolu ona ha’u mai buka ai-fuan iha ai-figeira ne’e, maibé la hetan ida. Tesi tiha nia! Tansá nia susu leet rai bokur?» (Lc 13,7).

Madre Mazzarello sujere mai ita orasaun signifikativa ida: «Dehan ba Na’i atu haraik tempu ba ó atu sai santa hodi manán klamar barak ba Nia» (Surat 19,2). Maibé ba nia, santidade ida-ne’e la’ós de’it rezultadu husi esforsu umanu. Santidade katak dosilidade ba Maromak nia serbisu iha ita-nia moris: “ida-ne’e maka Maromak nia liman ne’ebé serbisu iha ita” (Surat 66,2).

 

• Bíblia nune’e mós Konstituisaun, hanorin mai ita atu lee istória nu’udar salvasaun. Mundu nia istória, Kreda nia istória, Institutu nian, no mós ita-nia komunidade nia istória, foin-sa’e sira ne’ebé entrega mai ita nia istória, ita-nia istória pesoál mak istória ida salvasaun nian, rai-baluk iha-ne’ebé Maromak hala’o nia obra, iha-ne’ebé nia halo “kmanek boboot” no hamosu maravilla.

Ita-nia moris loroloron nakonu ho sinál Maromak nian atu interpreta. Fragmentasaun/divizaun, superfisialidade sai frakeza típika ita-nia tempu nian. Ema ne’ebé la hatene lee nia moris nu’udar “ofisina” ida iha-ne’ebé Maromak serbisu bá, fasil liu atu sente mamamuk, dezgostu, tendénsia atu sai insensivel/laran-metan, indiferente. La iha kbiit ba esperiénsia kle’an, maibé iha de’it impresaun ne’ebé liu lais.

 

• Maria, feto matenek ne’ebé «rai buat hotu iha nia fuan» (Lc 2,19.51) maka feto Magnificat ne’ebé lee moris rasik no istória nu’udar salvasaun. Nia, iha tinan 140 fundasaun Institutu nian, kontinua eduka nia oan-feto sira ba ksolok ne’ebé moris husi fiar no domin. Buat ne’ebé loos duni importante iha vida maka sente domin hale’u ita. Seguru katak domin rohan-laek ida hakohak ita-nia moris no bolu ita atu saran moris.

Husi ne’e maka natubu ksolok ne’ebé horik iha FMA nia fuan, naksira iha komunidade no sai klima, testemuñu domin nian iha moris loroloron no anúnsiu Jezús nian ba foin-sa’e mane no feto sira. Ita mak atan folin-laek, maibé hetan rahun-di’ak no mós responsabilidade atu hananu ninia grasa nia kmanek sira. Mai ita kumprimenta malu ho S. Ambrogio nia liafuan sira:

“Atu Maria nia klamar horik iha ita ida-idak atu hahí Na’i; atu Maria nia espíritu horik iha ita atu haksolok iha Maromak” (Commento al Vangelo di Luca 2,26-27). (sr Piera Cavaglià FMA)

Reflesaun husi sr Piera Cavaglià FMA