Dili – Husi loron 22-26 Jullu 2021, ami perpetuande sira, iha ami-nia preparasaun ba votus perpétua, ami haree mós tópiku “komunikasaun iha Institutu FMA”. Ir Jacinta Gusmão mak akompaña ami hodi fahe nia matenek no esperiénsia hotu kona-ba komunikasaun ninia valór iha Institutu nia moris no misaun.

Ami hahú ho Fundadór sira, Don Bosco no Madre Mazzarello, nu’udar komunikadór/a konjénitu/a sira, ne’ebé husik hela mai ita patrimóniu singulár ba Família Saleziana. Valdocco no Mornese mak ambiente ekosistema ida ho podér komunikativu. Iha Valdocco no Mornese, ekosistema komunikativu rua ne’e riku ho proposta umana sira, atensaun ba realidade no ba ema, intensionalidade formativa. La  hanoin kona-ba komunikasaun nu’udar dimensaun ida, maibé nu’udar kondisaun fundamentál misaun saleziana nian. Ambiente, nakonu ho valór espirituál sira, promove komunikasaun ida ne’ebé umana tebes duni. Don Bosco no Maria Mazzarello nia an tomak mak komunikasaun. Husi Don Bosco no Madre Mazzarello ita aprende atu halo ita-nia komunidade edukativa sira sai ekosistema edukomunikativu.

Tópiku seluk mak haree oinsá Institutu FMA iha ninia polítika raisk komunikasaun hodi buka fó vizibilidade ba karizma salezianu no buat di’ak ne’ebé hala’o, liuhusi animasaun, informasaun, formasaun no produsaun.

Tuirmai, ami mós hakle’an “Liña-Gia” kona-ba prezensa edukativa-evanjelizadora iha ambiente dijitál liuliu iha social network. Ita tama iha rede sosiál atu “La’o, ho foin-sa’e sira, iha dalan edukomunikativa no evanjelizadora, iha espíritu Don Bosco no Madre Mazzarello nian, hodi asume «fuan oratorianu»”. Ita presiza tama hodi la’o tuir  kritériu institusionál sira, katak, indikasaun sira ho natureza karizmátika no operativa ne’ebé orienta atu sai prezensa konxiente iha social network, atu aprende fahe no iha relasaun ho modu evanjéliku no étiku hodi tau matan ba kredibilidade eh konfiabilidade Institutu FMA nia identidade no misaun.

(Irmán perpetuande sira)