FESTA AGRADESIMENTU KOMUNIDADE MARIA AUXILIADORA – VENILALE

“Moris jenera ho moris. Hamutuk ita agradese Nai ba dom Espiritu familia nian”

24-07-2021.Hodi moris iha tempu ida ne’ebé nakonu ho Esperansa, ohin irmán no formande sira ho fuan no neon ida agradese Aman Maromak moris nia hun ne’ebé lori no halibur ami hamutuk iha fatin ida ne’e hodi serbi Nia no fo sasin ba Ninia domin neʼebé laiha rohan husi knaar ne’ebé ami hala’o loron-loron.

Depois de perparasaun ba festa ida ne’e, durante semana ida nia laran ami nia agradesimentu ida ne’e ami espresa ba malu liu husi ami nia orasaun mukit ne’ebé ami oferese ba Nai hodi reza no hanoin ba: alin orfaun sira, benfeitores(inan-aman), komunidade Edukativa, formandes, irmans, padre Salesiano sira ne’ebé fo asistensia ba ami nia vida Espiritual, kolaboradores no mos ba irman Diretora madre Olga Freitas Belo ne’ebé sai tali uniaun ba ami ida-idak hodi guia no jere moris tuir Espiritu Mornese nian.

Eukaristia Santa ne’ebé ohin ami selebra iha komunidade Maria Auxiliadora preside husi Padre Olivio da Costa, SDB. Iha homilia padre  hateten: “ita agradese ba Espiritu uniaun nian ne’ebé reflete ita nia moris hamutuk nu’udar komunidade ida ne’ebé simu misaun ida, guia husi madre Superiora  ne’ebé hakarak dirije komunidade lao ba oin nune’e ita agradese ba madre ninia prezensa ba komunidade ida ne’e. Iha ha’u nia reflesaun badak, ha’u foti liafuan 5 husi  Salesian life stile of consecrated person, ne’ebé sai nu’udar xave atu komprende ita nia vida konsagrada no  liga ho evanjellu:

1. Identidade: fini ne’ebé diak, hatudu liu husi ita nia perseveransa ba ita nia vokasaun
2. Fidelidade: durante ita nia luta, ita nia servisu iha dalan ida ne’e justifika  ka komfirma fini diak ida ne’e liu husi ita nia responsabilidade sira ne’ebé ita halo ba komunidade, ba ema sira ne’ebé iha liur no mos iha ita nia misaun sira ne’ebé ita halo.
3. Responsabilidade: knaar no responsabilidade ne’ebé ita hala’o, buka atu fo kualidade diak.
4. Kualidade : bele kualidade iha numeru, bele  mos kualidade iha ninia resultadu ne’ebé ita fo sai, kualidade ne’ebé ita fo sai iha ita nia misaun. Atu kualidade ne’e sai diak liu, ita kesi ita nia an ba Jesus, Nia ne’ebé fo Ninia moris tomak atu tulun ita no fiel hodi bolu ita no mos fiel ba Ninia promesa sira.
5. Santidade: atu hetan kualidade iha ita nia misaun, ita nia servisu sira iha kualidade ka lae, nu’udar ema konsagradu ̸ a hatene kesi ita nia an ba To’os Nain ne’ebé  ohin kari fini mak Jesus.

Kesi ita nia an ba Maromak, ba Jesus ne’ebé fiel nafatin hodi suporta no tulun ita maski ita ema sala nain halai ses, dalaruma ita la liga Jesus, maibé Jesus hatudu Ninia fidelidade hodi tulun ita iha ita nia viagem vokasaun nian.

Sai ema ne’ebé konsagradu ̸a ita nia dalan ne’e ida deit atu hetan santidade iha loron ida, lahó santidade ita nia servisu, misaun no buat hotu ne’ebé ita hala’o ne’e folin laek. Fini ne’ebé Maromak kuda iha ita nia fuan atu buras no sai diak  no barak liutan ho nina finalidade ikus mak santidade ne’ebé ma barak buka maibé difisil maske difisil maibé posivel ba ita.

Ba madre nain rua ne’ebé simu misaun foun hau husu atu kaer metin hau nia liafuan 5 maibé liu-liu mak responsabilidade ne’ebé kongregasaun tau iha imi nia liman, imi nia kabás leten atu lori. Responsabilidade ne’ebé ita hetan iha misaun ita haka’as an atu fo kualidade iha misaun no ita sei hetan santidade bainhira ita hala’o didiak ita nia knaar.”

Iha tempu hanesan irmán, formande no alin orfaun sira mos hato’o sira nia agradesimentu ba irmán Santina Moreira no irmán Cesarina Correia ninia prezensa iha komunidade ida ne’e. Ba imi nia domin, sakrifisiu, ksolok no responsabilidade tomak ami hato’o ami nia liafuan obrigada no deskulpa.

Obrigada madre Olga doben ba ita nia knaar animasaun nian, ami reza atu madre kontinua kultiva no jenera moris iha komunidade ida ne’e tuir Maromak nia hakarak.

Obrigada barak!

Cesarina Correia, FMA