Fuiloro – Loron 09 Jullu, Madre Alma Castagna, nu’udar Provinsiál FMA nian, hala’o vizita ba loron rua (09 – 12 Jullu) iha komunidade Fuiloro ho objetivu atu hasoru malu ho Irmán sira, liuliu haree realidade moris komunidade nian no mós tulun Irmán sira iha vida espirituál, misaun no komunidade nian.

Iha kalan tempu boanoite nian, Madre Alma aprezenta tema kona ba Katekeze Amu-Papa Francisco nian ne’ebé ko’alia kona-ba: “Eduka ba Esperansa”. Iha dadersaan tempu orasaun nian, fó mós tempu atu fahe reflesaun sira ne’ebé liga ho Papa nia katekeze ne’e.

Loron 11 Jullu, iha kalan fó mós tempu ba menina Koléjiu sira atu kumprimenta Madre Alma ho hananu agradese nian hafóin taka ho Boanoite husi Madre Alma rasik.

Iha Bonoite Madre fahe ho menina sira kona-ba moris amizade nian entre belun na’in rua ne’ebé kria amizade loos nian. Amizade la’ós dehan katak laiha konflitu, maibé liu husi konflitu mak hametin relasaun belun nian ne’ebé iha perdaun no tulun malu atu harii filafali amizade loos nian.

Iha tempu hanesan madre mós fó liafuan badak ba Irmán sira atu metin nafatin relasaun diak ba malu iha komunidade laran no mós tulun malu nu’udar bin alin.

Ikus liu Madre Ermelinda Gomes nu’udar Diretora Uma nian hato’o liafuan agradese nian ba Madre Alma ne’ebé nu’udar inan ida mai tuir nia oan sira fahe hanoin diak no mós fó korajen atu nafatin hala’o misaun hotu ne’e ho domin hodi la’o tuir Nai nia dalan iha moris konsagrada nu’udar Filhas de Maria Auxiliadora.

(Ines Freitas FMA)