Papa Francisco nia lia-menon molok harohan Angelus husi “Policlinico Gemelli”

Maun no biin-alin sira, bondia!

Ha’u haksolok bele mantein enkontru domingu Angelus nian, husi Policlinico “Gemelli”. Ida-ne’e mós Ha’u agradese imi hotu: ha’u sente imi-nia prosimidade no imi-nia orasaun nia apoiu. Obrigadu husi fuan!

Evanjellu ne’ebé ohin lee iha Liturjia hakturi katak Jezús nia dixípulu sira, ne’ebé Nia haruka, «kose mina ba ema moras barak no kura sira» (Mc 6,13). “Mina” ida-ne’e halo ita hanoin mós ba sakramentu Unsaun ema moras nian, ne’ebé fó konfortu ba espíritu no ba isin. Maibé “mina” ne’e mós mak mina raronak nian, prosimidade nian, solisitude nian, ternura nian husi ema ne’ebé tau matan ba ema moras: hanesan lolo liman hamaus ida nee’bé halo ema sente di’ak, hakmaan terus no fó kbiit. Ita hotu, lalais eh neineik presiza “unsaun” prosimidade no ternura nian, no ita hotu bele fó ba ema seluk, ho vizita ida, bolu liuhusi telefone, liman ida ne’ebé lolo ba ema ne’ebé presiza tulun. Ita hanoin katak, protókolu juizu finál nian – Mateus 25 – buat ida ne’ebé sei husu mai ita mak prosimidade ba ema moras sira.

Iha loron sira ospitalizasaun nian ida-ne’e, ha’u esperimenta dala ida tan oinsá importante servisu sanitáriu ne’ebé di’ak, asesu ba hotu, hanesan iha Itália no iha País sira seluk. Servisu ida gratuitu, ne’ebé asegura servisu ida di’ak asesivel ba ema hotu. La presiza lakon soin folin boot ne’e. Presiza mantein nia! No ba ne’e presiza ema hotu nia empeñu, tanba serve ba ema hotu no husu ema hotu nia kontribuisaun. Iha Kreda mós akontese dalaruma instituisaun sanitária ruma, tan jestaun ne’ebé la di’ak, la la’o ekonomikamente, no hanoin uluk ne’ebé mai mak faan tiha. Maibé vokasaun, iha Kreda, la’ós atu iha osan, maibé hala’o servisu nafatin gratuitu. Keta haluha ida-ne’e: salva instituisaun gratuita sira.

Ha’u hakarak esprime ha’u-nia apresiasaun no ha’u-nia enkorajamentu ba médiku sira no profisionál sanitáriu sira ospitál ne’e nian no ospitál sira seluk. Sira serbisu maka’as! No ita harohan ba ema moras hotu. Iha-ne’e iha belun labarik balun… Tanba sá mak labarik sira sofre? Ne’e mak pergunta ida ne’ebé kona fuan. Ita akompaña sira ho orasaun no harohan ba ema moras hotu, liuliu sira ne’ebé iha kondisaun difisil: atu labele husik ema ida mesak de’it, ema ida-idak bele simu unsaun raronak nian, prosimidade nian, ternura nian, kuidadu nian. Ita husu ne’e liuhusi Maria nia intersesaun, ita Inan, “Saúde dos enfermos”.