Dili –  Durante loron lima (5-9 Jullu 2021) ami hamutuk ho Ir Lanny Ganda FMA, ami hakle’an kona-ba votu pobreza ne’ebé apresenta husi kapítulu 18-28 iha ita-nia Konstitusaun sira. Loron primeiru ami hahú krús ne’ebé tulun atu kontempla kona-ba Jezús nia pobreza totál iha krús hahú husi nia moris, boot to’o mate iha krús. Depoizde adorasaun krús, molok tama ba matéria sira kona-ba votu pobreza nian, Ir Lanny hahú ho pergunta ne’ebé simples hodi husu saida mak signifikadu moris tuir votu pobreza mai ita relijiosa ? Tanba sá ita relijiosa tenke moris tuir votu pobreza?

Depois ida ne’e Madre konvida ami atu rona knananuk ida “Beati Voi” nu’udar introdusaun atu tama ba tema primeiru kona-ba Jezús no Kreda dahuluk nia pobreza ne’ebé sai nu’udar fundamentál atu bele komprende hakarak dehan saida mak rahun di’ak dahuluk nian ne’ebé dehan ksolok ba sira ne’ebé kiak iha laran. Loron sira tuir mai ami mós hakle’an kona-ba artigu ne’ebé liga ho dokumentu Institutu no kreda no mós konfronta ho ami-nia esperiénsia moris pobreza loroloron, no haree mós ba modelu pobreza ita nia fundador /a no mós modelu moris pobreza ne’ebé Maria nu’udar virjen pobre sai modelu ba ita hotu no mós oinsá Sa. José hatudu ninia pobreza liu husi ninia serbisu. Iha buona notte kalan-kalan, Madre mós konvida ami atu haree ba video badak ne’ebé Amu-Papa ko’alia kona-ba pobreza, renunsia no realidade konkretu kona-ba kiak sira ne’ebé akontese iha mundu no mós hodi haree figura sira ne’ebé oinsá sira nia dedikasaun atu serbi ema kiak.

Loron lima ne’e la’ós de’it rona no hakle’an matéria sira, maibe iha mós atividade jou ne’ebé husik mensajen ne’ebé ami rasik tenke hetan liu husi jogu sira ne’e hanesan oinsá hatene husik sasán hotu (detachment) atu banati tuir Jezús ne’ebé kiak/pobre, no oinsá hatene hili buat ne’ebé esensiál ba ami-nia moris nu’udar relijioza ne’ebé loos.

Hodi le’e no fahe mós kona-ba santu/a Saleziana nia moris pobre tulun ami mós reflete no konfronta ho ami-nia moris no esperiénsia ne’ebé ami hasoru iha komunidade no misaun, hodi husu ba an-rasik saida mak ami presiza hadi’ak atu bele moris lolos tuir espíritu kiak ne’ebé tenke espresa iha moris konkretu.

Molok remata estudu kona-ba votu pobreza, ami la husik mós Madre Jerál nia liauan pobreza nian nb tulun ami mós oinsá moris tuir espíritu pobreza nian hodi hatene halo auto-delimitasaun no auto-sustentabilidade iha komunidade no misaun ho foin-sa’e sira. Ami remata loron ikus ne’e hodi haree Kristu ne’ebé husik ba mundu ninia testamentu molok ami rasik halo ami-nia kompromisu pesoál.

(Irmán Perpetuande sira)