Beata Maria Romero Meneses

Filha de Maria Auxiliadora

Selebra iha 7 Jullu
Granada-Nicaragua, 13 Janeiru 1902 – 7 Jullu 1977

 

Beata Maria Romero mak klamar ida hanesan vulkaun. No nia moris iha Nicaragua, rai ho vulkaun haatnulu.

Ne’e mak realidade feto ida-nian moris husi família rika no ho prestíjiu (nia aman ministru finansa) ne’ebé saran an ba ema kiak liu husi ema kiak sira, ho konfiansa totál ba Providénsia. Sai boot iha família sarani, husi labarik nia sente nu’udar apóstola iha ninia maluk tinan hanesan nia leet. Maibé iha Costa Rica mak Maria deskobre – ho modu desizivu,  xokante – ema kiak sira nia kondisaun loloos. Nia deside dedika an ba sira lahó rezerva. No husi ninia inisiativa moris grupu ‘misioneritas’: liufali filantropia no pakote sira prezente nian, sira servi ema kiak sira iha sira-nia bairru, iha sira-nia uma kiak sira. No moris mai oratóriu sira no ‘Casita de la Virgen’, nafatin nakloke ba nesesidade materiál no espirituál sira ema abandonadu sira no “Obra Social” no «sidade ki’ik», no “Asociación Ayuda Necesitados”…

Maria Romero mate iha 7 Jullu 1977. La’ós de’it obra sira: krónika sira haktuir kona-ba orasaun, obediénsia, milagre sira (hanesan bee Na’i-Feto nian, kusin ida nakonu ho bee no iha laran iha medalla Maria nian; ninia ema kiak sira labele selu aviaun atu bá Lourdes!). No domin boot ba Jezús Eukaristia.

Biografia

Nia aman Félix Romero, ministru governu republikanu, ema laran-luak liu ho ema kiak sira. Maria aprende, husi ki’ik, signifikadu halo karidade konkreta maski hasoru difikuldade sira.  Nia inan Ana Meneses, tau matan ba oan sira ho domin boot.

Ninia família iha espetativa boboot ba nia: nia estuda múzika, pianu no violinu. Ho tinan 12 nia tama iha koléjiu “Filhas de Maria Auxiliadora”, iha-ne’ebé nia sempre hatudu espíritu disponivel no haksolok. Nia sente katak Don Bosco nia karizma kria ba nia duni.

Iha novisiadu nia hanorin múzika no kolabora iha oratóriu festivu, iha-ne’ebé ba dala uluk nia ih akontaktu ho pobreza juveníl. Halo tiha votu perpétuu sira, nia simu obediénsia atu serví iha San José iha Costa Rica, ne’ebé sai ba nia pátria daruak. Maski nia simu knaar hanorin iha koléjiu foin-sa’e riku sira, nia buka liuliu mak «labarik kiak no abandonadu sira», hanesan Don Bosco.

Husi aluna di’ak liu sira, nia forma dixípula sira ba Obra Oratóriu nian. Nia hanaran sira “misioneritas”. Sira bá iha ema kiak sira nia uma, tulun hamoos, lori hahán no hatais ne’ebé Ir Maria halibur no halo katekeze. Ho ne’e sira hahú oratóriu festivu ba labarik kiak liu: iha inísiu hamutuk 36!

Ho Maria Auxiliadora, ne’ebé nia hanaran ninia Liurai-Feto, mai oferta barak, ne’ebé apoia ninia obra sira. Ho médiku espesialista sira ne’ebé oferese nu’udar voluntáriu, nia konsege hamosu poliklínika ida, ho espesialidade oioin, atu asegura asisténsia médiku-farmaséutika ba ema kiak sira. Enkuantu ema moras sira hein ba konsulta, sira iha ba sira-nia dispozisaun sala sira atu tuir katekeze eh atu dezenvolve alfabetizasaun no kapela ida atu harohan.

Ba família sira ne’ebé la iha uma, Maria Romero koordena konstrusaun uma «loos nian», “ciudadelas de Maria Auxiliadora”: obra ida ne’ebé ohin loron kontinua, liuhusi Asosiasaun Leigu sira Asayne (Asociación Ayuda a Necesitados). Atu habelar devosaun saleziana ba Maria Auxiliadora nia koordena konstrusaun igreja iha sentru San José nian. Obra boot ne’ebé harii liuhusi fiar no benfeitór devotu sira-nia kolaborasaun, ne’ebé esperimenta efeitu devosaun mariana.

Nu’udar Don Bosco no Madre Mazzarello nia mak ema ida kontemplativa iha asaun. Ninia uniaun ho Maromak halo atu ema buka nia nu’udar konselleira espirituál. Ninia “Escritos Espirituales” hetan ona edisaun oioin.

Maria Romero mate vítima atake kardíaku (fuan), iha 7 Jullu 1977. Governu Costa Rica nian deklara nia nu’udar sidadán onorária nasaun nian. Ninia isin deskansa iha San José, iha Costa Rica, besik obra boot ne’ebé nia funda: “Casa de la Virgen e Obras Sociales”.

S. João Paulo II beatifika nia iha 14 Abríl 2002. Iha nia omilia iha loron ne’e, Amu-Papa S. João Paulo II dehan: “Ho domin apaixonadu ba Maromak no konfiansa lahó limite ba Virjen Maria nia tulun, Ir Maria Romero mak relijioza ezemplár, apóstola no inan ba ema kiak sira, la iha ema ida eskluidu, iha-ne’ebé, ba sira nia hatudu ninia preferénsia. Atu ninia rekordasaun  sai bensan ida ba hotu, no atu obra sira ne’ebé nia funda, entre sira-ne’e ‘Casa de la Virgen’ iha San José, kontinua sai fiél ba ideál sira ne’ebé halo nia mosu!”

Volontariato Internazionale Donna Educazione e Sviluppo (V.I.D.E.S.), Asosiasaun Internasionál Voluntariadu promove husi FMA sira, harii iha 1987, iha ninia Asembleia Jerál 11 Outubru 2015, hili Beata Maria Romero Meneses nu’udar sira-nia Padroeira.