Husi kedas sékulu III mak Liturjia tau hamutuk iha selebrasaun hanesan koluna rua Kreda nian, Pedro no Paulo. Sira rua Mestre ne’ebé labele haketak malu fiar nian no inspirasaun sarani ba sira-nia autoridade, simboliza Koléjiu Apostóliku tomak.

Pedro ema Betsaida nian, nia profisaun peskaór. Jezús bolu nia no fó misaun atu konfirma maun-alin sira iha fiar. Nia mak sasin dahuluk Jezús moris-hi’as nian no, nu’udar manu-ain Evanjellu nian, foti konxiénsia kona-ba nesesidade atu loke Kreda ba jentiu sira (Apóst 10-11).

Paulo husi Tarso, perseguidór maka’as Kreda nian, konverte an iha dalan ba Damasco. Husi loron ne’e, ninia badinas no isin-moris no matenek hotu, nia uza atu serví Evanjellu.  Nu’udar apaixonadu boot Kristu nian, nia hakat Mediterráneu tomak atu haklaken Evanjellu salvasaun nian, liuliu ba jentiu sira. Depoizde sofre persegisaun oioin, sira rua hotu hetan martíriu iha Roma. Hodi rega ho sira raan rai ne’ebé hanesan, “sira kuda” Maromak nia Kreda.

***

Selebra Apóstolu Pedro no Paulo mak testemuñu fiar iha Kreda “ida de’it, santa, katólika, apostólika”. Pedro mak, efetivamente, fatuk ne’ebé apoia nia an iha fatuk inan katak Kristu. Pedro, no Paulo korrente ikus ne’ebé liga ita ba Jezús. Hodi selebra Pedro no Paulo ita selebra “fundadór sira” ita-nia fiar nian, ai-hun eh abut povu sarani nian. Sira rua hetan martíriu iha Roma iha persegisaun Nero nian, maizumenus iha 64 dK.

Testamentu Foun permite atu ita rekonstroe, apostólu na’in rua nia itineráriu moris nian no halo ita konxiente kona-ba gratuidade hilin divina. Pedro mak peskadór Galileia nian. Nia loroloron halo nia moris iha tasi Tiberíade, ho nia aman Jonas no nia alin-mane André. Ninia servisu konsiste iha soe dai, hein, dada sai no, iha loraik, hadi’ak dai, hodi tur iha tasi ninin.

Iha-ne’ebá mak, loraik ida, bainhira soe hela dai ba peskaria ikus, nia rona, ho nia alin-mane, Jezús nia ne’ebé liu nia bolun: “Imi tuir ha’u; ha’u sei halo imi peskadór ema nian” (Mc 1, 17). Nune’e mak hahú ninia aventura estraordinária; nia tuir Mestre husi Galileia bá Judeia; depoizde Jezús nia mate, nia la’o lemorai iha Palestina, to’o muda ba Antioquia no, husi ne’ebá, finalmente to’o iha Roma.

Iha Roma, nia anima sarani sira nia fiar, ema dadur nia, oho nia iha Vaticano iha-ne’ebé nia hela ba nafatin, la’ós de’it ho nia rate, maibé mós ho ninia mandatu: nia hela iha sira-ne’ebé troka nia, buat ne’ebé sarani sira hanaran “kátedra Pedro nian” (kadeira Pedro nian), to’o Amu-Papa ne’ebé governa Kreda ohin loron. Iha nia, Pedro kontina sai “fatuk” atu Kristu kontinua harii nia Kreda, sinál unidade ba “ema sira ne’ebé invoka Na’i nia naran”.

La dook husi Pedro, deskansa Paulo ne’ebé husi persegidór sai Apóstolu Jentiu sira-nian, misionáriu laran-manas Evanjellu nian. Ninia martíriu revela substánsia fiar nian. Kreda nia koluna rua ne’e nia evanjelizasaun apoia sira-nia an, la’ós iha mensajen intelektuál ida, maibé iha praxis profunda ida, husi Jezús rasik nia terus no liafuan.

Pedro no ninia susesór sira nia fatin la’ós kargu onorífiku ida eh rekompensa méritu sira-nian. Ne’e mak servisu ida, servisu atu bali Na’i nia bibi sira: “Tau matan bá ha’u nia bibi sira”, Jezús dehan (Jo 21, 15ss). Ho devér atu fó sasin ba Nia, Jezús konfia ba Pedro ninia misaun nu’udar Atan no Bibi-Atan. Kristu nia sasin, bibi-atan no atan ba fiar-na’in sira mak prerrogativa sira ne’ebé, husi Kristu hatutan ba Pedro no, husi Pedro hatutan ba ninia susesór sira, bispu sira Roma nian.

Ita harohan ba Santu Padre, Pedro nia susesór, atu Na’i, ne’ebé entrega ba nia misaun ne’e, leno nia no halo nia bele konfirma nia maun-alin  sira nia fiar ba beibeik.