Dili (Timor-Leste) – Horisehik, iha Sentru JP II – Comoro remata ezersísiu espirituál anuál nian ba grupu dahuluk FMA sira na’in 51 iha-ne’ebé Amu-Bispu Basílio do Nascimento maka sai nudar pregadór ho tema “Evanjelizasaun Foun”. Tuir ir Suzana Alves, Amu-Bispu tulun irmán sira atu reflete liután kona-ba Kreda. Irmán sira hotu sente katak retiru ida-ne’e tulun no loke tan irmán sira nia koñesimentu kona-ba misaun iha Kreda. Nia hatutan tan katak “buat ne’ebé furak liu iha retiru mak ne’e: ami la’ós reflete de’it Maromak Nia Liafuan, maibé ho Maromak nia Liafuan ami tama ba problema oin-oin ne’ebé ohin Kreda enfrenta”.

 

Iha selebrasaun eukarístika konkluzaun nian, irmán juniora na’in 15 ho ksolok boot hatán ba Nai nia bolu hodi hafoun hikas fali sira nia votus kastidade, pobreza no obediénsia iha Institutu FMA. Iha oportunidade ne’ebé ita selebra tinan 140 Institutu nia fundasaun, irmán FMA ida-idak bele hafoun fali sira nia sín ba Maromak no foin-sa’e sira hodi “hakerek ho kór kriatividade evanjelizadora nian, intuisaun edukativa nian, aten-barani misionária nian, dalan santidade nabilan nian” hanesan Madre Jerál husu iha nia mensajen konkluziva ba aniversáriu Institutu nian. Ain tuba rai metin, matan hateke ba futuru, fuan metin iha domin ida de’it, ita la’o ba oin ho laran-manas atu haklaken Jezús ba foin-sa’e sira tuir Don Bosco no Madre Mazzarello nia ain-fatin. Mensajen esperansa nian mós mai husi ir Paola Battagliola, provinsiál TIN nian: “Ita hateke ba oin ho fiar no esperansa atu kontinua realiza Don Bosco nia mehi ba ita-nia Institutu iha Timor-Leste/Indonesia: sai monumentu moris gratidaun nian ba Ausiliadora no ninia obrigadu hanaruk iha tempu”.

Loron ne’e mós ita haksolok basá foin-sa’e postulante na’in lima ho naran: Sherly (Dili), Honoria (Railaku), Simoa (Fatumaka), Martinha (Ainaro) no Maria Natalina (Laleia- Manatuto), ho aten-barani buka halo esperiénsia ho Jezús metin liután. Irmán Paola Battagliola,FMA, nu’udar provinsiál simu sira na’in lima ne’ebé ho ksolok halo pasu foun iha sira-nia formasaun hodi hakat ba novisiadu. Ita reza ba sira atu hametin sira-nia domin ba Nai no buka deskobre liután fafurak moris konsagrada nian, no ita harohan atu foin-sa’e barak seluk iha korajen atu mós hili dalan konsagrasaun nian iha vida relijioza saleziana, liuliu iha tempu ne’ebé atrasaun mundu nian sai maka’as liután, hasees ta’uk hotu atu hatán ba Nai nia bolun.

Lia-foun di’ak seluk mak novísia rua mós ohin sei halo sira nia profisaun relijioza dahuluk: ir Maria (Baucau) no ir Meira (Lospalos) hodi proklama sira-nia kompromisu atu tuir Jezús ho radikalidade iha Institutu FMA. Ita akompaña sira ho orasaun.