“Imi simu degrasa, imi fó degrasa” (Mt 10,8)

FESTA AGRADESIMENTU KOMUNIDADE EUSEBIA

Dili – Ohin, Domingu XII Tempu Komún, monu iha 27 Juñu, ami komunidade Beata Eusebia Comoro Dili halo festa agradesimentu komunidade nian, ho tema ne’ebé dehan: “Grazie per la gratuità che accoglie”, katak tan “Imi simu degrasa, imi fó degrasa” (Mt 10,8). Festa nia sentidu atu agradese Maromak ba di’ak hotu ne’ebé ita simu liuhusi esperiénsia moris loroloron nian; agradese ba ema hotu ne’ebé ita serbisu hamutuk hodi misaun ne’e sai furak tan de’it domin ba Maromak no ba maun-alin sira. Festa ne’e sai furak hodi selebra hamutuk ho foin-sa’e volontariadu Palomino, padre Kapelaun sira, komunidade edukativa tomak.

Hodi hahú ho Eukaristia Santa ne’ebé prezide husi Padre Jojo SDB, no iha nia omilia foti pasajen husi Evanjellu loron Domingu nian: feto fakar raan ida no Jairo nia oan-feto ne’ebé moras todan hetan fali isin di’ak husi Jezús tan de’it fiar maske ida-idak ho situasaun ne’ebé la hanesan.

Nune’e fiar mak laran-metin ba rahun-di’ak sira ne’ebé ita hein. Husi ema nia fiar mak Jezús hatene kbiit sai husi Nia no ho fiar ita hetan kura, salva no restaura grasa Maromak nian iha ita. Ohin mós ita agradese, ita reza atu ida ne’e hahalok fó agradese no apresia ema nia di’ak ba ita, la’ós de’it ba Maromak ka iha eskola maibé mós ba ita nia familia no sosiedade. Grupu foin-sa’e volontáriu sira mak anima kántiku liturjia nian ho ksolok no ho lian ne’ebé furak.

Depoizde missa iha jogu amizade oioin ne’ebé sira hotu partisipa ho ksolok. Hafoin kontinua ho almosu fraternu tempu hanesan kumprimenta malu ho knananuk no dansa husi foin-sa’e sira no Irmán sira.

Festa taka ho mensajen badak husi Madre superiora ne’ebé dehan: ita hamutuk tanba Maromak mak bolu no ba misaun tan ne’e buat ne’ebé ita serbisu hamutuk mak halo ita sai metin no furak, ne’e mós motivu agradesimentu nian hanesan iha sharing horisehik: Saida mak ha’u simu degrasa atu fó degrasa?

Nu’udar empeñu fó ida-idak nia talentu, kapasidade, profisaun ne’ebé ita iha, nst… Buat hotu ne’ebé ita fó ba misaun mak ita nia kontribuisaun hodi serbisu hamutuk nu’udar Família Saleziana atu serví labarik ho foin-sa’e sira ne’ebé kiak no ki’ik iha komunidade nia misaun.

Onesiana Baptista FMA