“Grazie per la gratuità che accoglie” – “Imi simu degrasa, imi fó degrasa” (Mt 10.8).

Dili – Tema ba festa agradesimentu komunidade edukativa Eusebia Palomino foti inspirasaun husi pasajen evanjélika S. Mateus nian 10,8: “Imi simu degrasa, imi mós fó degrasa”.Maski sei iha “lockdown” no “serka sanitária”, komunidade lakohi husik leet tradisaun atu selebra festa gratidaun eh agradesimentu ne’e. Ba festa ne’e. Irmán sira hahú reza ba malu no ba edukadór sira, inan-aman, pesoál sira, foin-sa’e sira, asosiasaun sira durante semana ida nia laran.

Iha vijília tutun ba festa agradesimentu, foin-sa’e sira husi grupu voluntariadu Palomino Saleziana, profesór/a sira no FMA sira halo lectio divina no sharing Maromak nia Liafuan ne’ebé sai tema ba festa. Irmán Jacinta Gusmão FMA, fó pergunta tolu atu gia reflesaun no sharing: 1) Saida mak ita simu degrasa atu fó fali degrasa?; 2) Saida mak sai obstákulu ka impedimentu atu fó degrasa?; 3) Sá loos empeñu ne’ebé ita foti nu’udar komunidade edukativa atu moris ho entuziazmu foun misaun husi ohin bá oin?

Tuirmai sínteze sharing sira-nian ne’ebé fahe iha grupu sia:

SÁ DE’IT BUAT NE’EBÉ HA’U SIMU DEGRASA ATU FÓ DEGRASA?

Ita simu prezente barak husi Maromak: moris; família; vokasaun  sarani no saleziana, vokasaun edukadór/a nian; voluntáriu/a; don sira eh talentu sira, kapasidade sira; saude di’ak, matenek, badinas no vontade;  belun sira, labarik no foin-sa’e sira; tulun husi benfeitór/a sira.

SAIDA MAK IMPEDE ATU ITA FÓ DEGRASA?

Husi an rasik: la fiar an, interese pesoál, egoízmu, dezánimu bainhira la hetan rezultadu di’ak husi esforsu sira fó nian, limitasaun tempu, arrogánsia, ambisaun, laiha pasiénsia, kolen.

Husi ema sira: situasaun família ho ninia dezafiu no nesesidade sira, belun sira nia influénsia negativa.

Husi ambiente: pandemia covid 19, serka sanitáira, konfinamentu obrigatóriu, inundasaun no dezastre naturál sira, falta meiu transporte, impozisaun distansiamentu sosiál; kultura eh lia-moris  no lia-mate…

SÁ LOOS ITA-NIA EMPEÑU ATU FÓ DEGRASA IHA TEMPU IDA-NE’E (LOCKDOWN/POST LOCKDOWN…)

Ami agradese wain ba Maromak ba prezente murak ne’ebé Nia haraik mai ami ida-idak: iis moris nian, vokasaun sarani ba domin, talentu no kapasidade sira, profisaun no ami haka’as an atu:

• Dezenvolve liután talentu sira, moris di’ak liután vokasaun sarani rasik ne’ebé Maromak fó degrasa atu bele mós fó ba ema seluk ho degrasa.

• Sai husi comfort zone sira, husi toman sira, husi egoizmu sira, husi hanoin ba família rasik nia nesesidade no nesesidade pesoál sira, atu fó liután ho domin,  pasiénsia, laran-maus no entuziazmu iha misaun edukativa no voluntariadu;

• Sai ba periferia sira, hahú husi estudante sira iha eskola, atu to’o ba família no bairru sira, nune’e bele fó apoiu konkretu materiál, morál no espirituál.

Empeñu ne’e mak sei hasa’e durante Eukaristia iha domingu 27 Juñu 2021 ne’e, atu ho Maromak nia grasa gratuita mai husi Altár Na’i nian sai ai-han atu hala’o misaun edukativa no evanjelizadora, aleinde prontidaun atu bá to’o periferia jeográfika no ezistensiál sira iha ita-nia realidade.

(Komunidade Eusebia Palomino)