“Pájina foun hein atu hakerek ho kór kriatividade evanjelizadora nian, intuisaun edukativa nian, aten-barani misionária nian, dalan santidade nabilan nian”.

La Madre nia mensajen ba website iha okaziaun konkluzaun tinan 140 fundasaun Institutu nian -5 Agostu 2012.

 

 Parabéns ba ita-nia Família boot no furak – Buon compleanno alla nostra grande e bella Famiglia!

 

Ohin nia kumpre ninia tinan 140 moris nian no fuan foin-sa’e, nakloke ba orizonte boboot, funda iha abut forte nia leten, naksira esperansa ho matan fihir ba tempu foun ne’ebé moris daudaun!

Iha loron 5 Agostu 2011 ha’u haruka ba imi mensajen abertura nian ba tinan selebrativu fundasaun Institutu nian ba dala 140.

Iha okaziaun ne’ebá ha’u hakarak hanoin fali fatin sira Mornese nian, vizita filafali símbolu sira ne’ebé iha Madre Mazzarello no irmán dahuluk sira-nia itineráriu vida-espirtiuál-misionáriane’ebé to’o ohin loron ita sei apresia ninia rikusoin sira.

Husi tinan 140 sira-nia sín nian, ita hotu hakarak hafoun fali aliansa domin nian moris iha fidelidade ksolok nian no sai fekundu no atinje mundu nia rohan iha ninia dimensaun ekleziál no sosiál. Ita verifika propagasaun ida esperansa no konfiansa nian iha foin-sa’e sira nia moris, família sira nia moris, ita hotu nia moris.

Selebrasaun ne’ebé iha ita-nia realidade hotu sei moris iha loron 5 Agostu la taka pájina ida, maibé loke pájina foun ida ba Institutu nia istória iha futuru. Pájina foun hein atu hakerek ho kór kriatividade evanjelizadora nian, intuisaun edukativa nian, aten-barani misionária nian, dalan santidade nabilan nian.

Ha’u fahe ho imi hotu mehi ida, tuir Don Bosco no Madre Mazzarello nia ezemplu, ne’ebé mehi ho sasukat boot, fiar iha Maromak nia prezensa, ne’ebé ba la’o uluk ba ita, akompaña, hatudu dalan futuru nian no, liuliu, fatuk iha ne’ebé harii ita-nia fidelidade.

Mehi mak ida-ne’e: ha’u hakarak atu, ho korajen, lahó laran rurua, livre husi naha todan hotu, ita hafoun ita-nia moris fiar nian! Ida-ne’e mak abut ne’ebé haraik fekundidade ba Institutu no ba ita-nia moris.

Iha Outubru hahú Tinan Fiar nian, ne’ebé Bento XVI haklaken atu lembra aniversáriu da-50 Konsíliu Vaticano II no da-20 publikasaun Katesizmu Kreda Katólika nian. Iha fulan hanesan sei selebra mós Asembleia Jerál Sínodu Bispu sira-nian, ho tema: Evanjelizasaun foun ba tranzmisaun fiar sarani nian.

Ne’e mak akontesimentu rua ho signifikadu boot ba Kreda ne’ebé interpela ita-nia vida pesoál, komunitária no ida komunidade edukativa sira-nian, ne’ebé ha’u hatene haka’as an atu haklaken fafurak no forsa Evanjellu nian liuhusi misaun edukativa.

Nune’e, loke daudaun iha ita-nia oin, tinan ida iha ne’ebé ita haka’as an atu fó kbiit foun ba esperiénsia fiar nian, hanesan ho ida ne’ebé karateriza klima Mornese no Valdocco nian.

Fiar ida ne’ebé favorese komuñaun ho Maromak; ne’ebé loke ita-nia fuan ba ninia bolun nakonu ho surpreza loroloron; ne’ebé envolve ita-nia an tomak no nakfilak iha bee-matan ksolok auténtiku nian, iha esperansa ne’ebé la kauza deziluzaun, iha testemuñu místiku no profétiku iha mundu karateriza ho mudansa époka nian iha ne’ebé haluha tiha Maromak, ka liután ida-ne’e, sai indiferente iha ema sira nia moris, iha kultura, maibé mós nafatin iha ema nia fuan sente nostalijia ba nia.

Iha momentu ida-ne’e ha’u hanoin foin-sa’e barak ne’ebé hakarak hetan sentidu, prontu atu hateke ba futuru ho konfiansa. Ha’u hanoin iha sira barak seluk ne’ebé la barani ona hein, tanba deziluzaun ba promesa sira ne’ebé la realiza..

Ba sira hotu ksolok loos nia naran mak: Jezús!

Ba ita maka responsabilidade atu haklaken Nia ho sasin moris nian, ho fiar foun ida.

Ne’e la’ós ita-nia obra, maibé Espíritu Santu nia grasa ida ne’ebé, tenke husu ho insisténsia, ho konstánsia no konviksaun.

Ha’u iha serteza katak iha hotu-hotu iha vontade atu realiza mehi ida-ne’e, mehi ida  ita hakarak tebes ho fuan tomak. Ne’e maka mehi furak ida, iha ita-nia liman laran no iha foin-sa’e sira mundu tomak nia moris laran.

Ita husu ba Madre Mazzarello atu hatutan mai ita intuisaun no disponibilidade fuan nian, atu hakerek hamutuk ho ita pájina foun istória nian, liuhusi ksolok hola-parte nian ba Maromak, serví Nia iha fiar no iha plenitude domin nian no halo misaun entre jerasuan foin-sa’e sira motivu ba ita-nia vida.

Ba imi hotu, irmán doben sira, ba foin-sa’e sira feto no mane, ba Reitór-Mór, P. Pascual Chávez Villanueva, ba Grupu sira Família Saleziana nian no ba membru sira komunidade edukativa nian, ha’u hato’o loron 5 Agostu ida ne’ebé haksolok no nabilan.

Ha’u agradese, hodi Irmán sira Konsellu nia naran mós, ba mensajen sira ne’ebé to’o ba “aniversáriu” ita-nia Institutu nian. Maromak haraik bensan ba imi no Maria Imakulada Ausiliadora lori ba imi hotu nia fuan ksolok hola-parte nian ba karizma ida ne’ebé atuál nafatin iha Kreda no iha sosiedade.

Roma, 5 Agostu 2012.