FAMÍLIA SALEZIANA: FÓ SASIN KONA-BA ESPERANSA

Iha Reitór-Mor nia Estréia ba 2021, ho tema “La’o bá oin ho esperansa: «Haree, ha’u halo foun buat hotu» (Ap 21,5)”, nia fó proposta ruma atu ita iha kapasidade atu moris iha esperansa.

Símbolu resposta saleziana ba situasaun atu’al mai husi pandemia, mensajen Estreia 2021 iha nu’udar objetivu halo ita sai ida de’it nu’udar Família Saleziana. La posivel husik la konsidera katak ba fulan barak ona mak, ho intensidade boot ka ki’ik, mundu no nasaun sira sai paralizad (maski balun seidauk), maibé konserteza bolkada.

Mensajen tinan 2021 nian evidensia katak, iha realidade susar no terus nian ne’e ho ninia konsekuénsia sira, ita presiza esprime serteza katak ita esperansa mak dudu ita bá oin: tanba Maromak iha ninia Espíritu, kontinua halo «foun buat hotu».

Hodi esplika estrutura mensajen Estréia nian, padre Artime fó hanoin katak Don Bosco rasik liu husi situasaun difisil barak – inklui epidemia ida kólera – hodi la lakon esperansa, iha kontráriu, nafatin hasoru no motiva ema seluk atu bá hasoru no tau matan.

Momentu atuál mak okaziaun ba konxientizasaun no kompromisu iha buat hotu ne’ebé, molok pandemia mós, la di’ak, maibé ita hanesan baibain de’it: ema barak nia terus, epidemia moras seluk nian ne’ebé ladún habelar, halo aat hasoru kriasaun…

Nune’e, Estreia propoin mai ita leitura saleziana ida ba tempu ohin nian, atu hanoin ba prosesu alternativu sira hasoru kultura dominante, ne’ebé iha forsa atu realiza mudansa ba valór sira no vizaun nian. Nune’e, Reitór-Mor, atu mantein konkretude salezian, nia propoin fatin no situasaun sira iha-ne’ebé bele “aprende no ezerse esperansa”.

Buat ne’e hotu hodi husik nafatin MARIA, “MAROMAK INAN, FITUN ESPERANSA” nian akompaña ita.

Proposta ruma atu kontinua moris iha esperansa:

1.Deskobre hikas katak «fiar no esperansa la’o hamutuk». Empeñu: ita banati tuir Don Bosco no ninia kapasidade boot atu fó entuziazmu ba ninia foin-sa’e sira atu moris vida nu’udar festa no «fiar nu’udar ksolok».

2.Ita aprende katak orasaun mak eskola esperansa nian. Empeñu: ita la’o hamutuk ho foin-sa’e sira no ho sira-nia família hodi harohan, hodi aprende atu harohan di’ak liu no ezerse esperansa hodi harohan di’ak ba beibeik.

3.Ita sai boot hodi moris ho sentidu esforsu/difikuldade iha moris loroloron. Empeñu: ita tulun foin-sa’e sira no sira-nia família, no Maromak nia Povu, atu deskobre don sira Maromak haraik, hodi la halerik, hodi propoin objetivu sira ne’ebé fó entuziazmu no hasain monotonia no mediokridade.

4.Ita moris esperansa espesialmente iha períodu sira difikuldade no lakon-dalan nian. Empeñu:  ita husik Maromak eduka ita. Ita konfia iha nia liuliu iha momentu sira nakukun nian. S. Teresa d’Ávila, místika boot, rekoñese katak aridéz mak Maromak nia konvite ida atu «pasa bá oin».

4.Esperansa nu’udar filafali desizivu ba ema kiak no ezkluzu sira. Empeñu: iha ita-nia Família  fidelidade ba Na’i ho Don Bosco ho modu partikulár liu husi opsaun preferensiál ba ema kiak liu, ema abandonadu liu no ezkluzu sira.

5.Rekoñese an rasik iha ema seluk nia terus. Empeñu: sai fiél ba Don Bosco ohin, ita-nia Família Saleziana nia Aman, signifika horik ativamente iha parte ema sira ne’ebé sofre tipu oioin vioénsia injustisa nian.

6.Konverte an ba esperana katak fiar iha projetu Evanjellu nian. Empeñu: tan ne’e, nu’udar Família Saleziana Don Bosco nian, ita labele la hatudu sé mak razaun ba ita-nia Esperansa, Maromak Jezús Kristu nian no ninia Evanjellu.

7.Empeñu konkretu ida atu asume nu’udar Família Saleziana. Ita lee no habelar (mesak, iha família, hodi forma grupu) Papa Francisco nia ensíklika “Fratelli tutti”, ne’ebé tau iha buat hotu nia sentru ‘fraternidade’. Ensíklia oferese mai ita reflesaun furak ida kona-ba oinsá kura mundu nia kanek sira, halo reparasaun ba uma komún husi estragu umani no ambientál sira, no redús konsekuénsia sira husi dezigualdade sosiál no ekonómika ne’ebé sai boot ba beibeik. Ho Amu-Papa ita seguru katak ita sei konsege proteje patrimóniu ne’ebé Kriadór tau iha ita-nia liman nu’udar maun no biin-alin de’it, hodi manán tentasaun atu haketak malu no hanehan sira seluk. Hamutuk de’it mak ita hari’i mundu ida di’ak liu, ne’ebé fó esperansa ba jerasaun abanbairua sira.

Lia-loos ida atu hakle’an nu’udar rezultadu Estréia nian:

«Ita sarani sira moris husi esperansa: mate mak liafuan penúltima de’it, ida ikus nian mak Maromak, ida moris-hi’as nian, ida plenitude moris nian no moris rohan-laek. Bainhira ita abandona an iha konfiansa ba Maromak no ita laran metin iha Nia, ita iha serteza ida ne’ebé haraik hakmatek, katak ita ema la iha buat hotu iha ita liman, maibé ita iha Maromak nia liman. Ema sarani konfigura nia moris la’ós ho nia forsa rasik, maibé ho Espíritu Santu nia forsa. Iha tempu inserteza nian ita tenke abandona an ho konfiansa ba ninia gia».

7. MARIA NAZARÉ, MAROMAK NIA INAN, FITUN ESPERANSA NIAN

Maria, Maromak nia Inan hatene didi’ak katak sá iha konfiansa no hein kontra esperansa hotu, hodi konfia iha Maromak nia naran.

Ninia “sim” ba Maromak fanun esperansa ba umanidade.

Maria esperimenta kbiit-laek no solidaun iha Oan nia moris; nia rai iha nia fuan anúnsiu terus nian ne’ebé sei sona borus nia fuan (kf. Lc 2,35); nia esperimenta terus haree nia Oan nu’udar “sinál lia latuir malu” nian, inkomprensaun nian, ema hewai.

Nia hatene saida mak ostilidade no rekuza hasoru nia Oan to’o bainhira, iha krús hun iha Gólgota, nia komprende katak Esperansa la mate. Tanba ne’e nia hela ho dixípulu sira nu’udar Inan– «Na’i-Feto, ne’e ó-nia oan» (Jo 19,26) –, nu’udar Inan Esperansa nian.

 

«Santa Maria,
Maromak Inan, ami Inan,
hanorin ami atu fiar,
atu hein no atu hadomi ho ita.
Hatudu mai ami dalan ba Reinu.
Fitun tasi nian,
nabilan mai ami
no gia ami iha ami dalan» (Benedetto XVI, Spe Salvi, 50).
Amen.