AGRADESIMENTU FMA BALIDE –  “OBRIGADA” BA DOMIN NE’EBÉ ITA SIMU NO FAHE

Dili – Loron 11 Juñu 2021, loron Kreda tomak selebra solemnidade Jezús Futar Fuan Santu. Festa furak, iha ne’ebé ita fo sasin kona-ba Jezús nia domin laran midar nian mai ita ema maksalak sira.

Iha loron kmanek ida ne’e mos, komunidade selebra festa agradesimentu nian, hahi no agradese ba di’ak hotu ne’ebé Nia haraik ona mai ami iha tinan ida ne’e.

Tema ba ami nia festa agradesimentu nian mak HO JEZÚS NO MARIA ITA DEHAN “OBRIGADA” BA DOMIN NE’EBÉ ITA SIMU NO FAHE.

Maske festa ne’e la bele selebra hamutuk ho foin-sa’e, menina no komunidade edukativa sira, maibé komunidade nafatin selebra ho solemne.

Hahu kedas husi loron novena S. Coração de Jezús nian, ami mos reza no agradese ba foinsa’e, menina, benfeitores no kolaboradores, Padre kapelaun, Irmán ida-idak no postulante sira no loron ikus nian, ba sr. Angelita. Ami agradese Na’I, tan fo ona biban ida ne’e mai ami, atu fahe moris hamutuk. No loron ne’e hafurak ho Selebrasaun Eukaristia nian ne’ebé preside husi Pe. João Boavida. No kontinua ho orasaun agradesimentu nian, selebrasaun seluk no konfraternizasaun.

Na’i haraik tiha ona tinan ne’e, nu’udar grasa ne’ebé folin boot. Ksolok no triste, di’ak no susar, esperansa no dezafiu ami moris no sente. Esperensia sira ne’e, mai troka malu no dala ruma halo ami lakon korajen, maibé ami fiar, katak Maromak nia domin la husik ami. Tempu mai no liu, maibé Maromak nia domin rohan laek. Tan ne’e ami labele husik leet de’it ami nia moris hodi la agradese.

Atu taka ami nia haksolok hamutuk, ami ida-idak mos hatudu ami nia talentu, maibé liu-liu kompromisu atu tulun malu hodi moris di’ak liu tan iha futuru, atu nune’e Na’I nia misaun bele habelar liu tan iha rai ne’e.

(Komunidade FMA Bailide)