Dili –    Iha loron 01 fulan juñu 2021, ami grupu Juventude Voluntariadu Palomino Salesiano ho TLYFP, hodi selebra loron mundial labarik sira-nian iha bairu Bandeira-hun, Masilidun, Tasi-Tolu, ho tema Lee hodi deskreve buat foun, ho tema ida ne’e hodi festeza loron refere, atividade prinsipal ne’ebé hala’o mak lee livru sira, dezeñu no ikus liu taka ho animasaun.

Atividade sira ne’e ho objetivu atu haklean labarik sira-nia koñesimentu konaba oinsa atu hatene lee no dezeñu, seluk husi ida ne’e mos atu hadian labarik sira-nia mentalidade, oinsa atu hatene respeitu no rona ema seluk.

No iha loron mundial ba labarik sira ne’e, ami husi JVPS ho TLYFP, kria jogu no animasaun ba labarik sira hanesan jogu hatama pregu ba botir laran, lao ho bulaun no mós animasaun dansa hanesan chicken Dance, chocolate no seluk tan…, bainhira halo atividade animasaun no jogu remata, ami mós fahe prémiu ba manan-nain sira ba iha kompetisaun jogu hirak ne’e no seluk husi ne’e, ami mós fahe sasan ba labarik sira hotu ne’ebé partisipa loron mundial ba labarik sira, no mos hasai foto hamutuk ho labarik sira. Prémiu no sasan sira ne’e prepara husi grupu TLYFP ne’ebé mak hetan suporta husi doador sira.

No husi atividade sira ne’e hatudu resultadu ne’ebé positivu tamba labarik barak mak sente kontenti ho sira-nia loron ida ne’e, no ami husi grupu rua ne’e, haksolok tebes bainhira hare labarik sira kontenti ho ami-nia esforsu hamutuk hodi selebra loron ida nee.

Atividade selebra loron mundial ba labarik sira ne’e hetan lisensa husi autoridade lokal no tuir protokolu saúde-nian.

Dala-ida tan parabéns ba labarik sira iha mundu tomak, espesila ba labarik Timor-Leste.

“LABARIK SIRA MAK LORI ESPERANSA BA LORON ABAN-NIA KSOLOK NO FUTURU NE’EBÉ NABILAN, PARABÉNS BA LORON MUNDIAL LABARIK-NIAN”.

(Agostinho – Novita)