Ohin 14 Maiu Kreda universál selebra festa Apóstolu S. Matias nian.

Saun Matias nia naran sita dahuluk iha livru Apóstolu sira nia Hahalok 1,15-26.  Matias hola parte ba  apóstolu 12 liutiha Jezús nia mate no moris hi’as.  Nia substitui Judas Iskariotes nia fatin iha koléjiu Apostóliku, tan  mate tara-an depoizde komete traisaun a Jezús.

Númeru 12 importante liu ba grupu Apóstolu sira  tan simboliza tribu 12 uma-kain Israel nian no simboliza povu Maromak nian. Apóstolu 12 Jezús nian, nu’udar símbolu restaurasaun povu Maromak nian. Tan ne’e importante liu hili fali ema ida atu kompleta ba Apóstolu 12. Saun Matias sai eleitu liu husi sorteui no hanaran nia “ Apóstolu Póstumo”  katak depoizde Jezús mate, moris-hi’as no sa’e ba Lalehan.

Maske nia la hola parte ba Apóstolu 12 desde inísiu, maibé S. Matias eskolante ida ne’ebé akompaña Ministériu Mestre nian desde inísiu: hahú husi Jezús nia Batismu to’o sae ba lalehan. Nia hola parte iha eskolante nain 72 ne’ebé Mestre haruka ba haklaken iha aldeia sira ( Luk.10:1-24). Nia mak apóstolu ida fiél no koñese Mestre pesoalmente. Sai modelu fidelidade, onestidade no husik buat hotu.

Simu tiha kbiit Espíritu Santu nian, iha loron Pentekoste, nia bá haklaken Evanjellu iha rai Judeia, rejiaun Kapadosia no iha Etiópia hodi konverte ema wain ba fiar Kristu. Matias hetan persegisaun wain iha nia misaun apostólika. Maske nune’e la dezanima no la kole haklaken Kristu nia Evanjellu to’o fó nia moris rasik. Nia sai sasin fiél Kristu nian to’o mate, hodi simu koroa martíriu nian iha Etiópia iha-ne’ebé ema tesi nia ulun.