Bainhira ita halo sinál krús nian ita dehan: Hodi Padre, hodi Filho no hodi Espíritu Santu sira naran. Maromak Aman mak Kriadór buat hotu ne’ebé eziste, Nia kria ita tan hadomi liu ita. Maromak Oan mak Jezús Kristu, moris husi Maria, ne’ebé mai mundu atu salva ita. Nia mate, maibé moris hi’as. Maromak Espíritu Santu mak domin entre Aman no Oan. Espíritu Santu horik iha ita atu ita sai santu liután, tanba ne’e hanaran Nia Santifikadór. Maromak Aman mak Kriadór, Maromak Filho mak Salvadór, Maromak Espíritu Santu mak Santifikadór.

Mistériu Santíssima Trindade nian mak mistériu boot liu mistériu sira ita-nia fiar nian.  “Catecismo da Igreja Católica”, iha númeru 234, hanorin katak “mistériu Santíssima Trindade mak mistériu sentrál fé no vida kristán nian. Ne’e mak mistériu Maromak rasik nian. Portantu nia mak fonte ba mistériu hotu sira seluk fiar nian. Nia mak roman ne’ebé leno sira. Ne’e mak ensinamentu fundamentál no esensiál liu iha ierarkia lia verdade sira fé nian”.

Ne’e mak mistériu kona-ba Maromak ida de’it iha pesoa tolu. Aman, Oan, Espíritu Santu.  Hanesan, ezemplu, ita tau lilin tolu ne’ebé lakan, sira forma ahi-laka ida de’it, nune’e mós pesoa tolu Santíssima Trindade nian forma Maromak ida de’it. Aman Maromak, Oan Maromak, Espíritu Santu Maromak, maibé la’ós maromak tolu, maibé pesoa Divina tolu iha Maromak ida de’it.

Iha ita-nia Batizmu, Santíssima Trindade mai horik iha ita, basá ita simu batizmu hodi Padre, Filho no Espíritu Santu sira naran.

Hodi habadak

Maski ita labele esplika oinsá Maromak Trindade ne’e, maibé ita hatene katak Nia hadomi ita liuhusi pesoa na’in tolu.

• Nia mak kriadór buat hotu nian, razaun ita moris. Jezús bolu nia Aman.
• Nia sai ida hanesan ita, mai sai ita-nia maun. Ema hanaran nia Maromak Oan.
• Nia inspira ita no haraik forsa atu halo di’ak. Nu’udar Espíritu Santu halo ho apóstolu sira.

Mistériu Santíssima Trindade: iha Maromak ida de’it iha pesoa tolu, Aman, Oan no Espíritu Santu.

– Mistériu Enkarnasaun, pesoa daruak Santíssima Trindade nian, Filho, sai ema no moris iha ita leet.

– Mistériu Redensaun, Maromak nia domin, hatudu sai iha Jezús Kristu, salva ita, santifika ita.

– Iha Pentekostes, Espíritu Santu, kbiit Maromak nia domin nian, atua iha mundu.