Ohin kreda selebra S. Filippo Neri, padroeiru ba edukadór/a sira no komediante sira. Nia moris iha Firenze (Itália) iha loron 21 Jullu 1515, husi família ne’ebé profundamente kristán. Oan husi Francesco Neri no Lucrezia da Mosciano. Simu hanorin relijiozu ba dahuluk iha frade Dominicano nia Mosteiru Saun Marcos nian iha Firenze – Italia. Hafoin ho tinan 16 haruka ba Piedmonte San Germano atu fó tulun iha negósiu ba ninia aman nia primu ida, maibé Filippo hetan esperiénsia místika iha kapela ida ne’ebé pertense ba beneditinu sira iha Monte Cassino no husi ne’e nia deskobre ninia vokasaun ba saserdósiu. Lalais kedas nia hadook an husi soin materiál sira no muda ba sidade Roma iha tinan 1533 atu serví Na’i. Husik tiha nia estudu filozofia no teolojia, nu’udar LEIGU, nia deside halo apostuladu no hanorin katesizmu ba kiak sira, iha tempu ne’ebé kardeál sira komporta hanesan liurai no Roma iha hela estadu ignoránsia Relijioza, saserdote sira abandona parókia no igreja sira. Tan ne’e mak hanaran nia “Apóstolu Roma nian”.

Santu ida ne’ebé simu don alegria no laran-maus husi Maromak. Ema simpátiku iha nia modu trata ema seluk, ne’ebé fasil habelun ho ema hotu: traballadór sira, funsionáriu sira, ema faan sasán sira, labarik sira iha lurón no kardeál sira tan ninia sensu umór no haraik-an liu. Bainhira nia ba vizita uza linguajen simples ne’ebé dalabarak nia dehan: “ha’u-nia maun-alin, bainhira loos ita hahú hadomi Maromak? Ohin ita deside atu komporta di’ak?”. Nia dedika an ba orasaun pesoál no halo obra mizerikórdia korporál sira.

Iha tinan 1548, hamutuk ho nia konfesór no leigu na’in 15 harii Irmandade Santíssima Trindade nian atu organiza ezersísiu espirituál no tulun peregrinu sira. Hafoin harii ospitál Santa Trinita dei Pellegrini, hodi atende no tau matan ba peregrinu rihun ba rihun iha tinan jubileu 1575.
Iha 23 Maiu 1551 ho idade 36 ordena ba saserdote no hela iha Casa di san Girolamo, sede “Confraternita della Carità”. Filippo Neri nu’udar amlulik kontinua ninia vida apostólika maka’as ne’ebé karakteriza ona nia nu’udar leigu. Nia dedika an espesialmente ba konfisaun hahú husi dadeer to’o meiudia, ho kompaixaun boot lori sira tuir dalan santidade nian. Devosaun boot ba Eukaristia, dala barak éztaze durante selebra Eukaristia.
Iha 1575, Irmandade ida ne’e hanaran Kongregasaun Oratoriu S. Filippo Neri, hetan aprovasaun iha bula “ Copiosus in misericordia de Deus” husi Papa Gregório XIII.
Mate iha 26 Maiu 1595 ho idade 79 iha Roma. Kanoniza iha 11 Marsu 1622 husi Papa Gregorio XV. Festa litúrjika 26 Maiu.
Laran kmaus ne’ebé estraordinária no hamnasa midar mak ninia kilat apostoladu nian.