Venilale – Ohin 24 Maiu, loron espesial ba Familia Salesiana iha mundu tomak, tan selebra ho solenemente festa ita Inan Doben Maria Ausiliadora nian ne’ebé Don Bosco hili sai Inan, Tulun Na’in no Edukadora ba membru Familia Salesiana tomak no Madre Mazzarello afirma katak Maria Ausiliadora mak  nu’udar Superiora dahuluk uma-nian. Tan ne’e iha loron ne’e, ami komunidade Madre Mazzarello Venilale mós selebra festa ida ne’e ho solenemente.

Festa ne’e hahu ho Eukaristia Santa ne’ebé selebra husi Pe. Olivio Da Costa Ximenes, SDB ho ko-selebrante na’in tolu iha Parokia, hamutuk ho membru Familia Salesiana – ADMA, FMA, Salesiano Cooperador no Antigu/a Aluno/a sira. Iha omilia Amu selebrante esplika signifikadu husi liafuan MARIA  ba ema hotu ne’ebé prezente.  M katak Maria, Mãe no Modelu ho nia knar mak sai inan ba ita idaidak, Inan ba Santa Kreda no Inan ba Sarani sira hotu. Letra A katak Ausiliadora / Tulun Na’in; ne’ebé hatene ita-nia terus, susar no problema ne’ebé ita hasoru. Hanesan Don Bosco hasoru susar no terus maibé tau konfiansa iha Maria no nia dehan Maria mak halo buat hotu. Letra R Rainha do çeú e da terra; nu’udar prezente husi Aman Maromak no Jezús Kristu ba Maria, sai Liurai Feto Lalehan no rai nian, tan Maria nia fiar, obediensia no haraik-an liliu ninia kolaborasaun ho Maromak ba planu salvasaun nian. Letra I katak Intersesora no Imakulada; nu’udar Intersesora hato’o ita idaidak nia harohan no sai mediadora entre JEZÚS no ita  sarani idaidak. Imakulada tan nia Feto Virjen nafatin sala la’ek molok no depois kous Jezús Kristu. Letra A Ausiliadora/ Tulun Na’in, hatudu iha festa Kana-Galilea, Maria nia liafun ba Jezús :“sira-nia tua hotu ona” no dehan ba atan sira : “ Halo tuir buat ne’eb’e Nia dehan”. Maria antisipa Jezús nia milagre tan Maria preukupa loos ho ema nia problema iha sosiedade no iha situasaun emerjensia. Nune’e Jezús halo milagre iha tempu ne’eba. Iha ita-nia moris loron loron Maria nafatin lori ita nia problema ba Jezús. Hamutuk nafatin ho Jezús to’o krus hun no Maria hamutuk nafatin ho Apóstolu sira iha senaklu. Hafoin Amu selebrante husik hela pergunta 4 ba ema hotu atu husu ba an rasik; 1. Ha’u fiel nafatin ba Maromak  hanesan Maria iha tempu Covid ne’e? 2. Se mak sai ha’u nia modelu fiar nian? 3. Nu’udar Familia Salesiana dala hira ha’u halai ba Maria Ausiliadora iha momentu susar no terus hodi husu tulun? 4.  Ho maneira saida mak ha’u hametin ha’u-nia devosaun  ba Maria?

Iha tempu rekreiu nian, irmán sira ho interna na’in 33, liu husi grupu Asosiasaun idaidak fó onra ba ita Inan Doben liu husi knananuk no dansa sira. Hafaoin iha mós jogus animadu nu’udar grupu no individu ne’ebé prepara husi grupu Auxilium/Marianu. Jogus ba grupu  mak : lomba han fore-rai, forma puzzle no dansa balaun. Jogus individu mak; sira ne’ebé hetan suratahan iha sira-nia kadeira sei hato’o Poezia, kantu no fahe esperiénsia konaba Maria Ausiliadora ho espontaña.

Tuir mai Irmán diretora komunidade nian; Ir. Carolina, taka festa ida ne’e hodi konta mós ninia esperiénsia ho Maria Ausiliadora. Hafoin fó mós korajen ba komunidade tomak atu kontinua kuda devosaun ba Maria Ausiliadora iha momentu hotu ita-nia moris nian. Tulun ema seluk atu iha mós devosaun hanesan ita, no keta haluha  milagre ki’ik sira ne’ebé dalabarak ita hetan iha ita-nia moris liu husi Inan Ausiliadora nia intervensaun. Ho festa ida ne’e halo ami konxiente liután katak ami iha Inan ida ne’ebé nafatin proteje ami iha momentu susar no terus nian. Haka’as an atu moris tuir ninia virtude sira iha ami-nia moris nu’udar Filhas de Maria Ausiliadora no nu’udar menina asrama hodi halo tuir nafatin Maromak nia hakarak iha ami-nia moris loronloron.

(Alice Filipe FMA)