Dili – Loron 24 Maiu mak festa boot tebes ba FMA, SDB no Família boot Saleziana hotu  iha mundo tomak tanba selebra solenidade Maria Auxiliadora nian. Maria mos simu papel iha Kreda nu’udar tulun nain ba ema hotu ne’ebé presiza nia tulun tan ne’e Don Bosco habelar devosaun Maria nian ba ema hotu ne’ebé nia hasoru no hola parte iha família boot Salesiano nian. Maria sai inan no modelu ba FMA ida-idak, nune’e ohin FMA ida-idak hafoun fali sira nia moris no saran-an total ba Maromak nu’udar oan feto Maria nian no monumentu moris nian ba Maria Auxiliadora. Tan ne’e ho ksolok no fuan gratidaun nian, ohin Irmán sira komunidade tolu iha Comoro Dili, hamutuk ho Madre Provinsiál Me. Alma, menina sira, traballadores,reprezenta foinsa’e balun no professores balun, hasae agradese ba Maromak hodi selebra hamutuk solenidade Maria Auxiliadora nian no Arsebispu Don Virgilio do Carmo da Silva mak prezide misa ho solene hodi taka ho bensan Maria Auxiliadora nian.

Omilia:

«Iha tinan rua ona ita selebra festa Auxiliadora nian ho klandestinamente tanba tinan kotuk taka aat liu maibe tinan ida ne’e loke uitoan ona katak ita iha esperansa atu buat hotu sai di’ak liu tan. Nune’e mai ita hamutuk agradese ba Maromak ba di’ak hotu ne’ebé ita hetan husi ita nia inan doben Auxiliadora nia  intersesaun tanba devosaun ba Auxiliadora ita bele dehan nesesáriu la’os importante de’it. Ita ida-idak bele haree, Na’i-Feto nia papél iha ita nia moris, iha família, kongregasaun, Kreda no iha Jesus nia moris. Nia prezensa bele dehan nesesidade ida ba ita nia moris hanesan evanjellu  haktuir: sira nia tua laiha ona, nia hatene no koñese ita ema nia nesesidade ne’e sai mos ninia papél nu’udar intersesora atu hato’o no hasa’e ba Maromak, nia hanorin ita atu hatene tau ita nia-an iha fatin ne’ebé loos no halo buat iha momentu loos. Halo tuir buat ne’ebé Nia dehan, Na’i-Feto nia jestu sira fó hanoin mai ita katak ita iha hahalok ne’ebé nesesario iha moris. Maria mós hatene observa, intervein, la obriga no hatene orienta ema nia moris».

Mensajen Bispu nian, hakarak konvida ita hotu atu banati tuir Maria nia nia hahalok sira no kontinua habelar Maromak nia domin ba maluk sira. Hodi hateke ba Maria nu’udar inan edukadora nian mai ita kolabora hamutuk hodi servi ema hirak ne’ebé kiak no kiik hodi orienta sira ho esperansa ba moris ne’ebé sira buka no kontinua halo ita nia moris nu’udar monumentu moris nian ba Maria Auxiliadora, ne’e mak ita nia identidade FMA nian. Festa sai solene liu tan hodi fahe ksolok no domin liu husi merenda hamutuk nu’udar Maria nia oan doben sira.

(Onesiana Baptista FMA)