Dili – Iha viíilia ba “Maria Auxilidora dos Cristãos”, FMA halo Rozáriu ho prosisaun hamutuk ho foin-sa’e no trabalhadores sira hodi hanoin hikas fali Na’i-Feto nia prezensa no nia servisu iha ita nia moris. Ohin mós loron ikus Novena Maria Auxiliadora nian.

Rozáriu ne’e lori atu hanoin fatin sira nee’bé Maria, Jezús nia Inan, moris bá : Nazaré, Aen Karen, Belém, Kaná no Jerusalém. Kada grupu husi Irmán no foin-sa’e sira, prepara momentu ida-idak hodi hanoin mistériu Maromak nia prezensa iha moris Maria nian no  ne’ebé lori Na’i Makso’in mai mundu ba ema sira-nia salvasaun.

Nazaré, iha ebraiku ‘Natzèrat’ eh ‘Natzrat’, signifika nafunan, ‘matan-moris’. Saun Jerónimo tradús ba “ai-funan”. Fatin ne’e rai memória enkontru no diálogu entre Arkanju Gabriél ho Virjen Maria. Iha-ne’e Na’i nia Anju lori anúnsiu ba Maria no nia ko’us hodi Espíritu Santu nia kbiit. Nazaré mak fatin Liafuan hola isin, sai frajil, koko kondisaun umana. Iha Nazaré, Jezús sai boot “iha matenek, otas no grasa iha Maromak no ema sira oin” (Lc 2,52), hodi moris haksumik an no obedese ba Maria no José, to’o Nia husik Nazaré atu haklaken Maromak nia Liafuan.

Iha Aen Karem ita kontempla Maria nia laran-luak atu serví Isabel. Iha Belém ita kontempla Jezús Kosok-Oan nia moris iha fatin kiak ida. Iha Kaná ita kontempla Maria ninia solisitude atu lorin Jezús halo milagre dahuluk, milagre oras salvasaun nian. Iha Jerusalém ita kontempla plenitude salvasaun nian to’o Pentekostes.

Maske pandemia maibé la taka ami nia domin, kriatividade no devosaun ba inan doben Auxiliadora. Iha Nazaré, komunidade Eusebia sira hananu Ave Maria ho lilin tan Anju hato’o ba Maria katak nia nakonu ho grasa hodi kous Maromak Oan;  hafoin komunidade DP hamutuk ho menina sira prepara Maria nia Magnifikat hodi simu Maria nia ilas ho dansa magnifikat no drama kona-ba Jezús nia moris iha Belém. Komunidade S. José/Novisiadu sira prepara Maria iha Kaná hodi simu ilas Na’i-Feto ho dansa kultura Timor nian  no novisa sira simu Na’i Feto ho kantu ida hafoin halo drama Jezús lakon iha Templu.

Ne’e mak momentu ne’ebé ema ida-idak hatudu nia-an nu’udar oan hodi espresa ninia domin no gratidaun ba Maria liu husi dansa no tersu moris iha rozáriu ne’e, tan nia ne’ebé sai inan no tulun-na’in iha ema ida-idak nia moris. Nu’udar FMA Don Bosco hakarak ita sai hanesan nia, tulun-na’in ba foin-sa’e sira no liuliu monumentu moris Don Bosco nian ba Maria Auxiliadora.

(Noemia de Deus FMA – Onesiana Baptista FMA)