«Maun no biin-alin sira, bondia!

Ohin, iha Itália no iha Nasan seluk, selebra solenidade Axensaun Na’i nian, Pájina evanjélika (Mc 16,15-20) – konkluzaun Evanjellu Marcos nian – aprezenta mai ita Moris-Hi’as Na’in ho dixípulu sira molok sa’e ba Aman nia kuana. Baibain, ita hatene, sena sira adeus nian triste, lori ba ema ne’ebé husik hela sentimentu lakon nian, abandonu nian; maibé buat ne’e hotu la akontese ba dixípulu sira. Maski hadook an husi Na’i, sira la hatudu triste, maibé sira haksolok no prontu atu bá nu’udar misionáriu iha mundu.

Tanba sá dixípulu sira la triste? Tanba sá ita mós tenke haksolok haree Jezús ne’ebé sa’e ba lalehan?

Axensaun kompleta Jezús nia misaun iha ita leet. Defaktu, se tan ita mak Jezús tun husi lalehan, nafatin mai ita mak Nia sa’e ba lalehan. Depoizde tun iha ita-nia umanidade no kasu nia – Maromak, Maromak nia Oan, tun no halo an ba ema no foti ita-nia umanidade no so’i- oras-ne’e nia sa’e ba lalehan hodi lori ho nia ita-nia isin. Nia mak ema dahuluk atu tama iha lalehan, basá Jezús ema, ema loos, nia Maromak, Maromak loos; ita-nia isin iha lalehan no ida-ne’e fó ksolok mai ita. Iha Aman nia kuana oras-ne’e tur isin ema nian ida, ba dala uluk, Jezús nia isin, no mistériu ida-ne’e, ita ida-idak kontempla ninia destinu abanbairua nian. La’ós abandonu ida, Jezús horik nafatin ho dixípulu sira, ho ita. Nia hela iha orasaun, basá Nia, nu’udar ema, harohan ba Aman, no nu’udar Maromak, ema no Maromak, hatudu ba Aman kanek sira ne’ebé nia hodi so’i ita. Jezús nia orasaun iha-ne’ebá, ho ita-nia isin: nia nu’udar ita ida, Maromak ema, no harohan mai ita. No ida-ne’e tenke fó serteza ida, liután ksolok ida, ksolok boot ida! No ida-ne’e motivu daruak ksolok nian mak Jezús nia promesa. Nia dehan mai ita: “Ha’u sei haruka Espíritu Santu ba imi”. No iha-nee’bá, ho Espíritu Santu, sei hala’o komandu ne’ebé Nia fó iha despedida: “Imi bá mundu, haklaken Evanjellu”. No kbiit Espíritu Santu ne’ebé lori ita iha mundu ne’ebá, atu lori Evanjellu. Espíritu Santu loron ne’e nian, ne’ebé Na’i promete, no hafoin loron sia liutiha sei mai iha festa Pentekostes nnian. Espíritu Santu duni mak halo posivel atu ita hotu nune’e ohin loron. Ksolok boot ida! Jezús bá ona iha lalehan: ema dahuluk iha Aman nia oin. Nia bá ho kanek sira, ne’ebé sai presu ita-nia salvasaun nian, no harohan mai ita. No hafoin Nia haruka mai ita Espíritu Santu, nia promete mai ita Espíritu Santu, atu bá evanjeliza. Tan ne’e ksolok ohin nian, tan ne’e ksolok ohin loron Axensaun nian.

Man no biin-alin sira, iha festa Axensaun nian ida-ne’e, enkuantu ita kontempla Lalehan, iha-ne’ebé Kristu sa’e no tur iha Aman nia kuana, ita husu ba Maria, Liurai-Feto Lalehan nian, atu tulun ita sai iha mundu sasin-na’in brani Moris-Hi’as Na’in nian iha situasaun konkreta sira moris nian».