Dili – Ohin, 13Maiu , Festa boot ba Família Saleziana hotu iha mundu tomak liu-liu ba FMA sira, hamutuk hodi selebra solenidade Santa Maria Domingas Mazzarello nian. Tan ne’e ho pandemia ida ne’e ami Irmán sira iha komunidade 3 Comoro nian, hamutuk ho professores balun no foin-sa’e sira selebra hamutuk Eukaristia iha Gymn Maria Auxiliadora Comoro.

Missa ne’e prezide husi Padre Basilio-SDB. Iha ninia omilia haktuir katak ita agradese ba Maromak liu-liu ba grasa santidade ne’ebé St.Maria Mazzarello hetan iha ninia moris. Ne’e grasa ida ne’ebé nia hatene kolabora no loke-an, ikus mai fini importante ida ne’e buras. Iha Karta ba Ebreu sira dehan: Laiha santidade laiha ema ne’ebé hare’e Maromak. Nune’e atu haree Maromak presiza iha santidade, ita hotu mós presiza hakaas-an atu hetan santidade. Hanesan Maria Mazzarello hatene tau nia-an iha grasa nune’e ikus mai nia bele hare’e Maromak, no nia iha hahalok importante ne’ebé halo manán santidade mak haraik-an, ne’e mak sai baze fundamentál ne’ebé nia iha., xave atu loke odamatan Reinu Lalehan nian. Nia moris simples no la eskola, nia aprende hakerek no lee bainhira iha idade bo’ot ona ka sai ona Madre mak foin aprende, maibé nia fuan nakonu ho haraik-an no sabedoria ka nia hanesan doutora lalehan nian katak nia gradua ona ninia fuan iha ne’eba, tan ne’e nia hatene Maromak Nia hakarak saida ba nia moris. No meius ne’ebé lori nia ba santidade mak hala’o didi’ak nia knaar hanesan tein, dasa rai, halo to’os no suku. Ema hotu eskola iha universidade maibé Maria Mazzarello halo ninia doutoramentu iha Maromak no Maromak mak gradua nia ho santidade liuhusi virtude haraik-an.

Padre nia mensajen iha  omilia nian hakarak dehan ba ita atu hare’e ba Madre Mazzarello nia moris ne’ebé nakonu ho simplisidade no haraik-an hanorin mai ita katak dalan santidade nian mak pratika virtude rua ne’e, ne’ebé sai dalan ida atu ita mós bele tama iha Lalehan no ita sei hetan konvite espesiál ida husi Maromak mak Maromak rasik sei gradua ita iha Lalehan ho deit virtude rua ne’e no sabedoria ne’ebé Nia fo, la’ós diploma universidade nian.

Ami komunidade Eusebia kontinua festa ne’e ho fuan gratidaun no nakonu ho ksolok hodi kumprimenta Madre Jacinta Gusmão ho knananuk ida. Ho situasaun pandemia nian, ne’ebé limita ema barak nune’e iha loraik ami haksolok no agradese ba Madre Mazzarello hodi halo jogus amizade ho foin-sa’e sira grupu Palomino nian hodi pasa bola no balaun maibé molok jogu foin-sa’e sira mós kumprimenta Madre sira ho kantu ida, hafoin mensajen badak husi Me. Jacinta hodi lee Madre jerál nia mensajen, no sadik sira atu hatene lee situasaun ohin nian no sai kriativa hanesan Main.

Hafoin iha merenda hamutuk hodi fahe ksolok ho fraternidade no taka ho reza tersu hamutuk iha família sira nia uma.

(Onesiana  R. FMA)