Dili – Iha kalan 12 Maiu, vijília festa Madre Mazzarello nian, iha komunidade São José-Noviciado Komoro hetan priveléjiu  atu rona Buona notte husi ‘Madre Provincial’, Madre Alma. Lia fuan furak no kmanek sira ne’ebé nu’udar bukae no mós sadik ita ida-idak iha tempu ida ne’e.

Me. Alma dehan:

“Ha’u foti ideia ruma husi Madre Mazzarello nia surat, surat ba Diretora iha Villa-Colon, Las Piedras ne’ebé dehan ‘oras ne’e laiha buat seluk tan atu dehan ba ita se la’ós, ate- brani no keta iha fuan ida ki’ik, maibé fuan ida laran di’ak no ladún ta’uk nian, komprende? Kumprimenta ha’u nia Irmán sira hotu, imi hotu haksolok ba’.

Madre Mazzarello iha surat seluk dehan atu iha fuan boot, fuan laran luak nian, jenerozu. Ha’u hanoin iha momentu ida ne’e ita iha uma laran bebeik, bele monu iha risku ida ne’e, halo ita nia fuan ki’ik. Haree ba ita nia-an, haree komunidade no haluha buat ne’ebé iha li’ur. Madre Mazzarello fó hanoin atu ita tenke nafatin mantein ita nia matan, ita nia fuan nakloke ba mundu tomak. Ita ko’alia kona-ba covid, covid, iha ne’e maibé buat ne’e mundu tomak nian. Atu hanoin ba mundu tomak tanba Madre Mazzarello konvida ita atu iha fuan ne’ebé ladún ta’uk, wainhira bazeia buat barak ba ita nia-an depois ita deskobre katak ita nia-an iha limitasaun, husi ne’e ita ta’uk buat hotu. Tanba ita hatene katak labele. Maibé bainhira ita konfia iha Maromak, ita hatudu katak Maromak hatene di’ak. Padre iha ha’u nia oratóriu dehan bebeik ‘dala ruma ita reza atu manan Jezús ba ita’, loloos Jezús iha ona ita nia fatin la presiza dada nia. Nia hamrik tiha ona ho ita’.

Madre Mazzarello dehan imi hotu haksolok bá! Imi ba lee Cronistoria, Madre Mazzarello nunka dehan ba menina ida, hanesan ‘Maromak bolu ó atu sai Irmán’! Ba Caterina Daghero deit, tanba Caterina dehan ida ne’e la’ós ha’u nia dalan. Entaun nia dehan ‘hela iha ne’e, hein lai’. Selae, nia nunka dehan ba menina sira ida ne’e ó nia dalan. Maibé imi haree menina hira kedas husi sira nia koléjiu, husu atu tama. Tanba sá? Tanba sira haree Madre Mazzarello no Irmán dahuluk sira ne’ebé kontente. Sira haree feto ruma ne’ebé realiza-an. Tanba iha tempu ida ne’ebá feto sira la vale buat ida. Maibé feto sira ne’e hatene hamriik, hatene lori bá oin maibé liu-liu sira kontente. Ita preokupa tebes atu halo enkontru vokasionál, halo buat ne’e, halo buat ne’ebá; loloos ita transmite ita nia moris ka lae? Ida ne’ebé buat ne’ebé halo menina sira deside hili dalan ida ne’e. Haree ema ne’ebé ko’alia husi moris ida ne’ebé kontente. Ko’alia kona ba Jezús tenke iha buat ne’ebé iha esperiénsia. Iha esperiénsia Mornese sira hatene didi’ak katesizmu maibé liu buat ne’e, sira la hatene Teolojia ka Espiritualidade, maski nune’e sira moris no hatudu iha sira-nia moris ksolok hodi entrega buat hotu ba Maromak.

Ha’u hanoin ita husu grasa ida ne’e ba FMA iha mundu tomak liuliu ba ita nia Inspetoria. Iha servisu preparasaun ba Kapítulu Jerál Inspetoria barak dehan ba fali hun karizmátiku. Ita nia hun karizmátiku mak ne’e, la’ós liafuan barak-barak maibé moris ida ne’ebé foun. Mai ita haka’as-an, husu ba Maromak atu halo ita-nia moris ko’alia maski ita nia ibun la ko’alia buat barak, maibé ita nia moris dehan katak ita hetan rikusoin boot, tanba ne’e ita fó-an ba Maromak. Ita husu ba Madre Mazzarello ne’ebé ita selebra aban iha orasaun no mós iha ita nia empeñu loroloron nian hodi hanoin ida iha ha’u nia sorin tan ne’e ha’u mak hasoru. Obrigada e boa noite”.

Obrigada Barak Madre e Boa Festa Madre Mazzarello nian ba ita hotu.

(Noemia de Deus, FMA)