Provinsiál nia lia-menon ba Madre Mazzarello nia festa

Dili, 13 Maiu 2021

Irmán doben sira,

iha loron ida ne’e, ne’ebé kuaze komunidade hotu selebra madre Mazzarello (Indonesia selebra horseik tanba ohin mak loron Axensaun nian) ha’u hakarak hato’o ba imi mensajen ida, ne’ebé karik ladun kona irman sira ne’ebé hela iha Indonesia, maibé, iha aspetu jerál, di’ak ba ita hotu.

Se imi haree iha Fb Palacio da Cinzas gráfiku kazu pozitivu nian no imi lee buat ne’ebé tau iha diretora nia WA husi espesialista australianu sira, tebes tenke preokupa liu! Espesialista seluk dehan katak Timor nia n”umeru kazu pozitivu nian ki’ik, maibé se halo persentajen ho populasaun, ita-nia númeru aat liu fali India nian. Hodi hateke ba gráfiku ida ne’e, ita konxiente katak ita bele modifika (sai pior liu ka di’ak liu) baseia ba ita-nia lalaok no, ikus nian, ba ita-nia domin ba maluk sira duke ba buat ne’ebé ita gosta.

Ha’u hanoin katak ida-idak bele halo ezame de konxiénsia: tebes ha’u kumpri regra hotu ne’ebé situasaun ezije? (máskara, distansiamentu sosiál…) Buat hirak ne’e la’o ho prevensaun no, loloos, ita mak espesialista iha Sistema Preventivu, “ita-nia espiritualidade espesífika no métodu asaun pastorál.” Konst n. 7), nune’e ita sai modelu ba povu kona-ba prevensaun? Liuliu komunidade sira ne’ebé iha labarik ka menina iha uma laran, presiza prudénsia boot liu: ita-nia ba-mai, hasoru ema barak iha li’ur depois fila, bele lori moras ba sira ne’ebé, ho konfiansa, ema no Maromak entrega iha ita-nia liman. Hanesan Madre Jerál hato’o ba Irmán CIAO nian ne’ebé halibur ba Kapítulu: “iha ita-nia Institutu, esperiénsia hatudu katak momentu susar nian mak momentu ne’ebé Irmán sira sai kriativu liu”. Ita bele haboot ita-nia kriatividade hodi buka dalan ne’ebé la ezije kontatu, maibé mantein relasaun metin nafatin ho ita-nia emar sira.

Interesante rona esperiénsia iha Vietnam, iha ne’ebé Governu ezije konfinamentu no povu kumpri didi’ak (sira moris iha rejime komunista no hatene katak bainhira la tuir regra, kastigu sei mai todan!), liu tiha semana 3 ka 4, ema pozitivu kuaze la iha ona! Tan ne’e, iha preparasaun Kapítulu nian, sira hakerek katak prevensaun maki ta-nia forsa!

Ohin ita selebra Madre Mazzarello: nia mós halo esperiénsia konfinamentu nian iha Valponasca, maski ba motivu lahanesan. Don Pestarino hadook nia husi Mornese atu manán virus gossip nian no laran-moras nian no maski nia susar atu simu, halo tuir Don Pestarino nia liafuan no oferese ninia terus ba menina sira. Madre Jerál, iha ninia mensajen hakerek: “Ita mós tenke simu no oferese ita-nia ezodu sira husi buat ne’ebé seguru no halo ona esperiénsia, atu ba hasoru buat ne’ebé foun… no ita simu bolun atu halo, ho modu partikulár, iha tempu ida ne’e ne’ebé modifika ekilíbriu barak iha ita-nia sosiedade sira no iha mundu”.

Ho sentidu ida ne’e, ita harohan hamutuk ba ita-nia Inspetoria no Institutu tomak, atu la bele kole buka dalan foun sira ne’ebé lori ita besik foin-sa’e no labarik nia fuan: Madre Mazzarello, Inspetoria nia Padroeira, sei hatudu dalan mai ita.

Boa Festa ba imi hotu

Sr. Alma