Maria Mazzarello moris iha 09 Maiu 1837, iha Mornese, iha norte Itália nian no bolu familiarmente nu’udar Maín. Oan husi ema agrikultór sira, onestu no sarani di’ak, Maín sai boot hodi dedika an ba serbisu iha to’os no tulun nia inan tau matan ba nia alin sira, maibé liuliu buras iha domin ba Jezús eukarístiku no Maria. Nia hetan moras tifu bainhira nia iha tinan 23 no, hetan fali isin di’ak ho modu milagrozu, maibé lakon forsa atu kontinua serbisu iha to’os. Nia dedika an ba kostura, maibé ho finalidade atu hanorin menina sira ninia aldeia nian no liuliu halo sira hatene no hadomi Jezús. Bainhira nia koñese Don Bosco, sira harii Institutu Filhas de Maria Auxiliadora – Irmán Saleziana sira.

Hodi selebra ninia festa ita husu ba nia atu tulun ita moris ho ninia atensaun ba ema sira no domin ba Jezús:

“Maín, ami hakarak hateke ba ó no husi ó simu dame hakmatek nian husi ó ne’ebé hadomi maka’as labarik no foin-sa’e sira.
Ami hakarak aprende ho ó ksolok ne’ebé halo di’ak no habelar esperansa no domin.
Ami hakarak komprende no husik ó-nia aten-brani feto forte nian hadaet ami, ó ne’ebé luta ba mundu ida umanu liu no haksolok, hodi tuir Jezús nia dalan.
Halo ami loke an hodi buka no hala’o Na’i nia projetu mai ami. Hanorin ami haksolok, ho ksolok moos, ne’ebé mai husi laran, husi sabedouria Espíritu nian. Tulun ami metin nafatin iha konfiansa ba Na’i maski hasoru difikuldade sira moris nian, liuliu iha tempu konfinamentu no pandemia nian ida-ne’e, basá Nia mak ami nia moris no Nia de’it mak hatene oinsá ami to’o ba ksolok”.