Papa Francisco nia lia-menon molok reza Regina Coeli, iha 2 Maiu 2021

«Maun no biin-alin sira, bondia!

Iha Evanjellu Domingu V Páskua nian (Jo 15,1-8), Na’i aprezenta an nu’udar ai-uvas loos no ko’alia kona-ba ita nu’udar sanak sira ne’ebé labele moris lahosi hela hamutuk ho Nia. Nia dehan nune’e: «Ha’u mak ai-uvas, imi sanak sira» (v. 5). La iha uvas-hun lahó sanak sira, no viseversa. Sanak sira la autosufisiente, maibé depende totalmente husi ai-uvas, sira-nia ezisténsia nia hun.

Jezús insiste kona-ba verbu “hela”. Nia repete dala hotu iha pasajen evanjéliku ohin nian. Molok husik mundu ne’e no bá Aman, Jezús hakarak asegura ninia dixípulu sira katak sira bele kontinua  iha unidade ho Nia. Nia dehan: «Imi hela iha Ha’u no Ha’u iha imi» (v. 4). “Hela” ida ne’e la’ós hela pasivu ida, “toba dukur” iha Na’i, husik moris hatoba ita. La’e, la’ós ida-ne’e. “Hela” iha Nia, hela iha Jezús ne’ebé Nia propoin mai ita mak hela ativu ida, no mós resíproku. Tanba sá? Tanba sanak sira lahú uvas-hun labele halo buat ida, sira presiza linfa atu bele sai boot no atu fó fuan; maibé mós uvas-hun presiza sanak sira,  basá fuan sira la natubun husi ai ninia hun. Ne’e nesesidade resíproka ida, hela resíproku atu fó fuan, Ita hela iha Jezús no Jezús hela iha ita.

Uluknanai ita presiza Nia. Na’i hakarak dehan mai ita katak molok observánsia ba ninia ukun-fuan sira, molok rahun-di’ak sira, molok obra sira mizerikórdia nian, presiza sai ida ho Nia, hela iha Nia. Ita labele sai sarani di’ak se ita la hela iha Jezús. No ho nia ita bele buat hotu (kf Fil 4,13). Ho Nia ita bele buat hotu.

Maibé Jezús, hanesan uvas-hun no sanak sira, presiza ita. Karik parese brani loos atu dehan ida-ne’e, nune’e ita husu: iha sentidu sá loos Jezús presiza ita? Nia presiza ita-nia sasin. Fuan ne’ebé, ita nu’udar sanak, tenke fó mak sasin ita-nia moris sarani nian. Depoizde Jezús sa’e ba Aman, dixípulu sira-nia knaar – ita-nia knaar – kontinua haklaken Evanjellu, ho liafuan no ho obra sira. No dixípulu sira – ita, Jezús nia dixípulu sira – halo hodi só sasin nia domin: fuan ne’ebé tenke fó mak domin. Metin ba Kristu, ita simu don sira Espíritu Santu nian, no nune’e ita bele halo di’ak ba maluk sira, halo di’ak ba sosiedade, ba Kreda. Husi fuan sira mak ema rekoñese ai-hun. Moris sarani loos nian fó sasin kona-ba Kristu.

No oinsá ita bele konsege? Jezús dehan mai ita: «Imi hela ihaHa’u karik no Ha’u-nia liafuan sira hela iha imi, imi husu buat ne’ebé iha hakarak no sei halo ba imi» (v. 7). Ida-ne’e mós barani loos: serteza katak buat ne’ebé ita husu sei fó mai ita. Ita-nia moris nia fekundidade depende ba orasaun. Ita bele husu atu hanoin hanesan Nia, halo hanesan Nia, harre mundu no sasán sira ho Jezús nia matan sira. No nune’e hadomi maun no biin-alin sira, hahú husi sira ne’ebé kiak no terus liu, hanesan Nia halo, no hadomi sira ho fuan no lori ba mundu fuan sira laran-di’ak nian, fuan sira karidade nian, fuan sira dame nian.

Ita saran an ba Virjen Maria nia intersesaun. Nia hela nafatin iha unidade ho Jezús no lori fuan barak. Atu nia tulun ita hela iha Kristu, iha nia domin, iha nia liafuan, atu fó sasin Na’i Moris-Hi’as iha mundu».