Dili – Iha 27 Abril 2021, iha Escola Maria Auxiliadora, Comoro, mais ou menos tuku 18:00 otl, hili ona estrutura principal ba iha Grupo Foin-sa’e Voluntariado Palomino Salesiana hanesan Prezidente, Vice-Prezidente, Sekretariu nain rua no Tesoreira no iha loron 2 Maio 2021 hili ona mos Prezidente ba Sesaun Kiik sira seluk ne’ebe sei tulun Grupo refere.

Naran Palomino ne’e rasik foti husi naran Beata Eusebia Palomino, FMA, ne’ebé sai padroeira ba iha Comunidade Beata Eusebia Palomino, Madre Salesiana sira ne’ebé hela no tau-matan ba Escola Catolica 1 no 2 Ciclo de Maria Auxiliadora.

Grupo Palomino mak grupo jovem ne’ebe servisu voluntariamente iha Escola Maria Auxiliadora hahuu husi loron 4 Abril hodi tulun Madre Salesiana sira hodi tau-matan bai ha Familia refujiadu sira ne’ebe hela iha eskola refere tamba kauza husi dezastre natural ne’ebe akontese iha dili laran iha loron hanesan ne’ebe rezulta familia sira ne’e balun atu hetan estragos no lakon sira nia hela fatin. Servisu ne’ebe jovem voluntario sira ne’e tulun hodi halo mak te’in, anima labarik sira, halo visitasaun hamutuk ho madre sira ba familia afetado sira seluk iha Area Comoro nian. La’os de’it too iha tulun familia refujiadu sira ne’ebe hela iha escola Maria Auxiliadora. Bainhira familia sira ne’ebe hela iha Escola refere fila hikas ba sira nia hela fatin, jovem hirak ne’e la lakon, sira nafatin mai hamutuk hodi hametin sira nia unidade no nafatin hala’o asaun karidade ba fatin sira seluk inklui Mase-Lidun hodi ba vizita no haree familia sira seluk ne’ebe presiza duni tulun. Ho esperiensia sira ne’ebe grupo voluntario ne’e iha, grupo refere hakarak atu kontinua sira nia unidade no ikus mai hamutuk ho Madre Salesiana sira hamosu Grupo Foun ida ne’e ne’ebe hanaran Grupo Foinsa’e Voluntariado Palomino Salesiana.

Jovem hotu ne’ebe hola parte iha grupu foun ne’e antes hamahon aan ona iha grupo seluk ne’ebe ikus mai hamutuk hodi harii fila fali grupo foun ida ne’ebe bele hamahon sira hamutuk ba ho objetivo, missaun no missaun ida. Antigos Alunos Escola Maria Auxiliadora (AAMA), Grupo animadores nian ne’ebe hamahon aan iha Movimento Juvenil Salesiano (MJS) no Grupo Juventude Hadomi Komunidade (JHK) mak grupo boot tolu ne’ebe maioria jovem voluntario hirak ne’e antes mai husi.

Hafoin de Jovem hirak ne’e mai hamutuk hodi harii sira nia estrutura ba sira nia Grupo refere, sira mos kontinua kedas atu haree sira nia Vizaun, Missaun no Valores ba Grupo ne’e ne’ebe sei sai sira nia Guiao ba sira nia desizaun no asaun sira. Molok kompleta Estrutura Grupo ne’e nian, Grupo ne’e rasik hala’o formasaun kona ba Beata Eusebia Palomino nia moris hodi tane aas dignidade no direito ema kiik no mukit sira nian. Hafoik taka ho fahe esperiensia no orasaun tersu nian tuir Amo Papa Fransisco nia intensaun atu hapara pandemia.

Ikus liu, ho grupo ne’e nia prezensa Foinsa’e sira ida idak bele espresa sira nia ksolok durante ne’e iha ne’ebe sira serbi maun alin sira no hakarak nafatin atu sai Kristu nia Apostolu ba Maun Alin Foinsa’e sira liu liu sira ne’ebe Ki’ik no Mukit liu.

 

(Hakerek husi Vitoria Belo, membro Grupo Palomino)