Venilale – Ohin Domingu dahaat Domingu Bibi Atan Diak nian ne’ebé dedika mós ba loron vokasaun nian. Ohin mós Institutu Filhas de Maria Auxiliadora iha mundu tomak selebra loron gratidaun ba Madre Jerál, Madre Yvonne Reungoat FMA, ba ninia animasaun iha Institutu nu’udar inan, talin komunaun no sentru unidade nian, ida ne’ebé nafatin fó korajen ba irmán sira atu hala’o  Na’I nia misaun salvasaun nian ne’ebé saran ona ba fundador sira liman ho Espíritu Mornese nian.

Tan ne’e ohin, kolejiu Madre Mazzarello Venilale mós selebra festa gratidaun ida ne’e, ne’ebé ho tema:  “ In rete per una cultura della vita” ho selebrasaun Eukaristia iha kapela kolejiu. Eukaristia selebra husi  Diretór komunidade, Pe. Jose Ximenes SDB.  Iha omilia Amu selebrante hateten katak Kristu mak  modelu Bibi Atan ne’ebé di’ak, Nia ezije ba sira ne’ebé tuir Nia ain- fatin presiza mós sai hanesan Nia hodi hadomi no serbi ho fuan tomak, konese nia bibi sira no saran an to’o mate ba nia bibi sira. Hafoin amu selebrante salienta liutan katak, bibi atan sira iha Kongregasaun no Institutu nian mak sira ne’ebé  susesór  fundadór/a  Don Bosco no Madre Mazzarello nian. Sira serbisu maka’as, atu kontinua karizma no knar ne’ebé fundadór sira simu husi Maromak atu labele mate maibé kontinua buras liliu salvasaun ba foinsae sira nian. Festa gratidaun ba Madre Jerál dehan katak agradese Maromak ba ninia animasaun iha Institutu, ba ninia enkorajamentu ba irmán sira iha mundu tomak atu kontinua hala’o misaun.  Harohan nafatin ba Madre Jerál atu sai matenek nafatin no Maromak hakonu nafatin ho Ninia grasa oioin.

Hafoin iha tempu rekreiu kontinua ho jogus –  forma puzzle, kadi kakutak ho pergunta sira konaba Madre Jerál nian no Institutu nian. Tamba loron vokasaun nian nune’e segundu ano aprezenta drama konaba Moises no Profeta Ezequiel nia vokasaun no misaun. Nu’udar Buona note, Ir. Carolina aprezenta fali madre Jerál nia sirkular  ne’ebé fó korajen ba irmán sira.

(Alice Filipe FMA)