Ohin dia 24, loron ne’ebe ita komemora Na’I Feto Auxiliadora nian, iha tempu hanesan komunidade Divinia Providencia mos oferese ba menina sira formasaun kona ba vokasaun moris nu’udar kaben nain nian. Orador ba formasaun ida ne’e mak Sr. Segismundo (coordenador geral ASC-Dili nian) no nia esposa sra. Maria Isabel no mos akompaña husi Pe. Lorenço SDB, delegadu coperadores nian. iha biban ne’e, sira ho domin no sacrifisio tomak dedika sira nia tempu atu fahe ho menina sira vokasaun santa nu’udar kaben nain.

Husi formasaun ida iha pontu lima (5) ne’ebé importante:

1. Saida mak vokasaun
2. Oinsa ita moris vokasaun santidade ida ne’e?
3. Vokasaun hakarak hari’i uma kain
4. Simu sakramentu matrimonio/kaben.
5. Moris lor-loron nu’udar kaben nain.

Saida mak vokasun?

Vokasaun mai husi lian: vocare “ to call “, vokasaun ne’e bolu ida, ka chamada ida. Maromak mak bolu ita no ita mak hatan.

Em prinsipiu, ita hotu ne’ebé simu batismu(sai kristaun), simu vokasaun ida de’it no uniku. Vokasaun moris sabntidade nian (Lumen Gentium, DOC. Vat. II kona ba Igreja, no.39).

Liu husi batismu Maromak bolu ema ida-idak atu konsagra-an tomak ba nia. Maromak bolu ema ida-idak ba moris santidade nia ka moris iha uniaun intima, no inseparavel ho Maromak. Santidade ka moris santu ne’e duni mak Maromak nia dejezu mai ita ema. Saun Paulo dehan: “ Maromak nia hakarak ne’e ida de’it, ita ema nia santidade.”

Vokasaun hakarak hari’i uma kain mak komitmentu husi ema nain rua ne’ebé hadomi malu no deside atu moris hamutuk. Atu bele moris hamutuk:

1. Sira tenke koñese malu di’ak no mos envolve familia husi parte rua (feto no mane) tuir tardisaun ne’ebé iha.
2. Simu sakramento matrimonio: Halo juramentu iha kreda, tau Maromak nu’udar sentru no hala’o moris lopr-loron nu’udar kaben nain.

Iha moris lor-loron nu’udar kaben na’in presija tau atensaun ba pontu importante hirak ne’e, mak hanesan: Uniaun, oinsa hasoru problema sira ne’ebé mosu, perdaun, diskusaun, finansa, privasidade, generu (kultura), oinsa eduka oan sira preparasaun b sira nia futuru (eskola no moris spiritual). Tamba familia mak hanesan eskola dahuluk ba ema, tan husi ne’ebé sira aprende oinsa atu respeita, hadomi no oinsa atu ko’alia di’ak ho ema.

Depois de formasaun kona ba familia kontinua kedas ho Ir. Suzana Alves Dos Santos ne’ebé fahe ninia esperiensia  moris konsagrada nu’udar Irmã Salesiana FMA, ho menina sira. Pontu importante 3 ne’ebé irmã Suzana fo sai mak :

1. Buka deskobre Maromak nia planu.
2. La’os hatais mak deside ita, maibé ita nia konvensaun.
3. Konfinsi ba buat ne’ebé
4. Labele hakarak buat hotu, se la’e sei lakon buat hotu.

Nu’udar ema konsagrada ita tenke agradese ba Maromak ba vokasaun santa ne’ebé ita simu, tan ita nia vokasaun ne’e uniku no espesial, nune’e ita tenke hadomi no tau matan ba ita nia vokasaun no buat ida ne’ebé importante tan mak ita haksolok ho buat ne’ebé ita hili (ita nia vokasaun rasik. Obrigada ba Me. Suzana ne’ebè ho laran kman hatan ona ba ami nia konvite hodi fahe ho ami esperiensia moris konsagrada ida ne’e. Ami promote sei reza ba madre atu Na’I fó bensa nafatin ba knar hotu ne’ebé hala’o.

Husi esperiensia ida ne’e konvinsi menina sira atu komesa hanoin atu hili buat ne’ebé diak ba sira nia futuru no atu hatene fo valor ba moris familia no moris konsagrada. Ikus liu menina sira agradese ba sr. segismundo ho nia esposa, Pe. Lorenço SDB ne’ebé akompaña ona señor no señora no mos ami agradese Ir. Suzana ne’ebé fo ona tempu atu fahe rikusoin moris konsagrada nian ho ami. Maromak ne’ebe laran diak sei fo bensa no selu sira nia laran diak. Dala ida tan obrigada barak.

Loron ne’e mos komunidade hamutuk ho menina sira halo lectio Divina ba festa agradesecimentu Madre geral nian Madre geral ne’ebé sai tali komuñaun no sentru unidade nian iha Institutu. Ami komunidade agradese, ba Madre nia fuan inan nian no mos ba dedikasaun tomak ne’ebé fo on aba Institutu Dala ida tan. Obrigada barak Me.Yvonne Reungoat.

(Komunidade Divina Provvidenza)