Dili (Timor-Leste) – Ezersísiu Espirituál sira nu’udar João Paulo II define maka: «konjuntu ida meditasaun no orasaun nian iha atmosfera konsentrasaun no silénsiu nia laran, liuliu impulsu partikulár interiór ida husi Espíritu Santu atu loke klamar nia orizonte ba asaun grasa nian» (Angelus João Paulo II nian, Roma, 16 Dezembru 1979). Ezersísiu Espirituál sai esperiénsia forte Maromak nian, se ita hatene loke an no simu Nia, hodi Espíritu Santu nia kbiit,ne’ebé iha klima ida silénsiu nian, orasaun nian no hodi mediasaun Gia ka Pregadór ida nian, haraik mai ita kapasidade dixernimentu nian, atu halo purifikasaun fuan nian, konversaun moris nian iha tatuir Kristu nian, atu nune’e bele kumpre didi’ak misaun rasik iha Kreda no iha mundu.

Fulan sira Jullu no Agostu nian maka tempu grasa nian no renovasaun espirituál ba irmán sira. Iha Jakarta, ir. Apolonia no ir Domingas hala’o sira nia Ezersísiu Espirituál hamutuk ho irmán kanosiana sira iha Bintaro husi loron 23 to’o 30 Jullu 2012. Sira nia pregadór maka padre Irawan SSCC. Tema jerál reflesaun sira nian maka”Membenahi sikap dasar kita untuk semakin menghayati hidup tertakdis kita”. Iha lia-tetun:  Hadi’ak ita-nia atitude baze sira atu bele moris di’ak liután ita-nia moris konsagrada. Maromak nia domin iha Kristu maka konsagra ita, bolu ita moris iha komuñaun no haruka ita ba misaun ida, sai ninia manu-ain. Atu sai reflesu di’ak Maromak nia mensajen domin nian, ita tenke loron ba loron sai instrumentu transparente liután kona-ba Maromak nia domin ne’e.

Ezersísiu Espirituál iha Timor-Leste fahe ba grupu rua. Grupu dahuluk, ho irmán 51, inklui formande novísia sira, hahú iha loron  28 Jullu to’o 4 Agostu 2012 iha Komoro Dili.

Pregadór maka Mons. Basilio do Nascimento. Tema ba retiru tinan ida ne’e mak “Evanjelizasaun foun”. Tema Evanjelizasaun Foun ne’e atu la’o hamutuk ho tema Tinan Fiar nian. Oinsá maka haklaken Jezús iha mundu ohin loron? Premisa dahuluk iha loron dahuluk reflesaun nian maka  Maromak la husu atu ba konverte ema, maibé atu’fó’ hodi la sukat “ha’u la matenek, la soi… Importante maka ‘fó’ tanba ita mak instrumentu de’it, disponivel nafatin”. Ita mak uluknanai rai-baluk evanjelizasaun nian molok evanjeliza ema seluk.

Grupu daruak sei halo Ezersísiu iha semana ikus fulan Agostu nian.