Jakarata – Iha vijília solenidade Aprezentasaun Na’i nian, komunidade Regina Pacis Jakarta halo lectio divina prepara husi Ir Maria Dolores Ruiz Perez, FMA.

 

Lectio hahú iha l’iur uma nian ho prosisaun liur, akompaña ho kantu to’o iha kapela. Hafoin tuir pasu ida-idak

1. Invokasaun ba Espirito Santo. Viene Sancte Spiritus
2. Leitura Lk, 1.26-38 ne’ebe le’e ho atensaun boot no ho solene.
3. Meditasaun: Irma Loli subliña lia fuan 6 husi testu Evanjelu:
4. Haksolok: nia liga ba ita nia espiritualidade Salesiana, Don Bosco no Madre Mazzarello sira nia desideriu bo’ot atu ita haksolok nafatin.
5. Nai ho ita: Maromak ho ita nafatin, ita bele sente maka’as Maromak nia presenza hamutuk ho ita iha ne’ebe deit ita hela no hala’o Misaun.
6. Keta tauk: Dala barak liu-liu iha tempu hirak ne’e ita moris iha tauk nia laran. Maibe ita tenki rona no fiar katak Maromak lor-loron hato’o mai ita lia fuan ida ne’e. Nia hadomi ita.
7. O hetan grasa wain: Dala hira mak ita simu Maromak nia grasa wain ba wain. Ita la prezisa atu husu maibe ita tenki konsiente deit ba Maromak nia grasa ida ne’e.
8. Ba Maromak la iha buat ida la bele: Lor-loron bele hahu fali halo dalan, Maromak ohin loron kontinua koalia mai hau, iha klean liu iha hau nia fuan, dehan mai hau katak ba Maromak la iha buat ida labele. Hafoun no hahu nafatin buat foun iha hau nia moris. Nia moris nu’udar Ema sai hau nia belun amigu helan nafatin ho hau.
9. Hau mak ne’e: Maria nia hatan ba Maromak. Kontrariu iha momentu sira ne’e Maromak mak afirma mai ita ho nia lia fuan ba Maria, katak nia iha. “Hau iha keta tauk iha nakukun o nia moris nian, konfusaun nia laran, distraida nia laran, Hau mak ne’e”. Loli  fo hanoin katak ita labele hanoin deit ba Maria nia hatan ba Maromak maibe hanonin mos Maromak nia hatan mai ita iha moris lor-loron nian.
10. Tuir fo tempu atu kontempla
11. Kondivizaun
12. Orasaun

Esperiénsia ne’ebé furak tulun ita atu haklean no fahe Maromak nia lia fuan ne’ebe kona liu ba ita nia realidade ohin loron.