Castelgandolfo (Italia) – “Eukaristia maka enkontru permanente no boot entre ema no Maromak, iha ne’ebé Na’i halo an nu’udar ita-nia ai-han, fó An rasik  atu nakfilak ita ba Nia”. Nune’e Bento XVI iha Angelus, hodi komenta evanjellu ohin nian kona-ba multiplikasaun paun no ikan sira-nian: “milagre ne’e la prodús husi buat mamuk, maibé hahú husi partilla ki’ik-oan husi buat ne’ebé labarik simples ida soi”. Jezús la husu buat ne’ebé ita la soi – nia tutan tan –, maibé hatudu mai ita katak se ita ida-idak oferese buat uitoan ne’ebé ita soi, bele halo milagre foun ida: Maromak iha kbiit atu hakbarak ita-nia jestu ki’ik-oan ida-idak domin nian no halo ita hola parte iha ninia prezente”. Jezús hatudu “iha nia an rasik paun ne’ebé fó moris” no Eukaristia mak “Kristu nia sakrifísiu ba mundu nia maksoin”. Ho liafuan seluk, “Jezús la’ós liurai rai ne’e nian ne’ebé ukun hodi domina, maibé liurai ida ne’ebé serve, ne’ebé hakruuk ba ema atu habosu la’ós de’it hamlaha materiál, maibé liuliu hamlaha ida kle’an liu, hamlaha Maromak nian.

Tanba ne’e mak, Amu-Papa dehan, “ita husu Na’i atu halo ita deskobre filafali importánsia atu habosu ita-nia an ho Kristu nia isin, hodi partisipa fielmente no ho konxiénsia iha Eukaristia, atu sai ida de’it ho Nia”.”Tempu hanesan – nia konklui –, ita hakarak harohan atu la kura ba ema ida paun ne’ebé presiza ba vida ida ho dignidade, no hatún hotu dezigualdade hotu la’ós ho kilat sira violénsia nian, maibé hodi partilla ho domin”.

 

Hafoin orasaun Angelus, Amu-Papa ko’alia kona-ba trajédia iha Síria no Irake. Nia husu no harohan atu boot sira iha sabedouria fuan nian atu kontinua halo esforsu hodi buka dame, husi mós parte internasionál, liuhusi diálogu no rekonsiliasaun, nune’e bele hetan solusaun polítika ba konflitu. Nia mós harohan ba nasaun Irake, ne’ebé iha loron hirak ne’e sofre atentadu grave sira ne’ebé halo ema mate no kanek barak, atu bele hetan dalan sira estabilidade nian, rekonsiliasaun nian no dame nian.