Dili – Iha loron 20 Fevreiru 2021, Infância/Adolescência Missionária sira iha formasaun ho Tema: “Orasaun Eskola, ba Esperansa”. Iha formasaun ida ne’e ita sei haklean tema ida ne’e liu husi Maromak nia lia fuan sira kona-ba esperansa. Iha tempu ida ne’e ita hasoru laloran bo’ot (Pandemia covid-19) nian bele halo ita lakon esperansa ba futuru, ba moris no ita nia mehi sira. Entaun, iha tempu kuarezma ne’e Maromak nia Liafuan husu saida ba imi nia grupu ida-idak?

Iha grupu 12  ho nia pasajen ne’ebé la hanesan, sira fahe iha grupu laran hafoin aprezenta fali iha grupu boot ho empeñu ne’ebé gropu ida-idak hili atu moris iha tempu pandemia(covid-19) no mós iha  kuarezma ne’e mak:

• Fó tulun ba ema ne’ebé mak presiza ita nia tulun
• Respeita malu, tulun malu no ajuda maluk nu’udar Maromak Oan.
• Iha tempu kuarezma ita presiza halo buat tolu ne’ebé Santa Kreda husu ba ita sarani sira mak Orasaun, Jejum no Karidade.

Orasaun: Reza ba ema ne’ebé mak terus iha kadeia, ba hira ne’ebé moras iha ospital, ferik no katuas sira, la haluha ba ita nia maluk sira ne’ebé iha nasaun seluk hetan moras covid 19 balun mate, balun sei iha perigu laran ita reza atu Na’i Maromak haraik ba sira grasa isin di’ak no forsa atu sira hasoru dezafiu hotu-hotu.

Jejum: Iha jejum nia laran ita mós presiza atu reduz alimentasaun ne’ebé ita han la’os ba de’it hahan maibé mós ba ita- nia hahalok aat sira, liafuan aat sira ita ko’alia la sukat ba malu, nu’udar infânsia/adoelexensia misionaria buka haka’as-an hodi hanoin Jezús nia terus.

Karidade: Fahe buat ne’ebé mak ita iha ba ema seluk husi sasan ou bele mós husi ita nia liafuan sira bele tulun sira. No buat ne’ebé mak ita presiza halo iha tempu pademia ne’e mak; Nu’udar sidadaun Timor ita tenki kumpri regras ne’ebé mak ministeriu saúde fó sai mak hanesan: Tenki uza maskara, Fase liman ho sabaun, halo distansiamentu social maizumenus 1, 5 metros.  Ida ne’e mak infância missionaria  nia empeñu liu husi orasaun, sakrifisiu no hahalok di’ak sira.

Hafoin taka ho orasaun: Ami Aman, Ave Maria no Gloria.

(Ana Ivonia Sequeira FMA)