Dili – Loron 14 Fevereiru, Família Saleziana no parókia Maria Auxiliadora hamutuk ho Pe. Manuel Fraile SDB, agradese Maromak iha Santa Missa ba don vida saserdotál ba tinan 50. Amu Manuel Fraile sai misionáriu iha Filippinas, hahú bainhira remata filozofia, besik tinan 20 (eskola, sentru oratóriu, bairru kiak no parókia) no hafoin, bainhira nia rona katak iha Timor presiza misionáriu voluntáriu nia ho maluk seluk oferese an mai Timor, no iha ne’e ba tinan 30.

Iha finál selebrasaun Eukaristia nian, Pe. Manuel Fraile hato’o liafuan esensiál rua: agradesimentu no deskulpa.

Agradesimentu ba Maromak ne’ebé fó moris no vokasaun, ba família (maun-alin na’in lima ho inan-aman), ba kongregasaun ne’ebé halo nia deskobre ninia vokasaun misionária, halo nia haburas ninia kapasidade sira no fó nia serbisu ne’ebé nia bele halo tuir ninia kapasidade sira. Nia fó hanoin buat ne’ebé Don Bosco promete ba membru sira: “serbisu, paun no lalehan”. No tuir Amu Manuel, iha etapa hotu nia moris to’o agora nia esperimenta kreximentu!

Pe Manuel espresa gratiduan boot ba povu Timor-Leste ne’ebé hatene simu nia, ho respeitu, pasiénsia, komprensaun, nu’udar “amlulik”, “alter Christus” hodi serbisu hamutuk.

Kona-ba Parókia Maria Auxiliadora, nia hahú ho knaar husi Amu-Bispu Carlos Filipe SDB. No iha serbisu hotu, sempre hala’o ho leigu sira, ho relijioza sira husi kongregasaun oioin. Bainhira atu tau sai parókia, buat importante naran: nia espontaneamente dehan “Maria Auxiliadora”, nu’udar Nia rasik mak hakarak. Nu’udar salezianu, Pe. Manuel konsidera Na’i-Feto rasik hakarak naran ne’e, nune’e, nia mak Inan atu obedese depoizde Maromak. Nune’e nia agradese tebes ba Maria Auxiliadora. Iha parókia Pe. Manuel hatudu domin boot ba kiak sira, ferik-katuas sira, moras sira. Nia mós hadomi foin-sa’e sira no haburas grupu kategoriál sira neebé eziste iha dioseze maibé mós grupu Família Saleziana nian hanesan ADMA no Salesianos Cooperadores.

Missa selebrasaun jubileu ne’e prezide husi Amu Arsebispu Don Virgílio do Carmo da Silva SDB, nu’udar bispu datoluk Dioseze Dili nian, ne’ebé halo Amu Manuel haksolok liu tanba, husu nia atu halo tradusaun Bíblia nian. Mehi ne’e, Amu Manuel revela, nia iha ona desde tinan 10 liubá no hahú ona halo iha raskuñu sira, maski la fiar se ema sei simu… Ho Amu Virgílio nia hetan fiar, dudu, aperta, no fó korajen atu halo, tanba tuir nia konfisaun se karik bispu seluk, la’ós Don Virgílio, sei la apresia ninia tradusaun. Nune’e, serbisu, iha tempu ne’ebé loloos reforma, kontinua iha, no tradusaun Testamentu Tuan nian, lansa ona tinan kotuk, iha 8 Dezembru 2020, aniversáriu da-80 Dioseze Dili nian. Padre Manuel espera bele kontinua neineik-neineik, ho foin-sa’e salezianu sira iha “Centro Pós-Noviciado” nia tulun, iha tinan sira Maromak haraik ba nia moris atu remata mós livru sira Testamentu Foun nian.

Aleinde ne’e, nia liafuan daruak, ho badak de’it mak husu deskulpa ba liafuan ba hahalok ruma “la jeitu” sira ne’ebé bele lahalo di’ak ba sarani sira, nu’udar ema hanesan ema hotu ho defeitu sira mós. “Obrigadu ba pasiénsia no komprensaun”.

Tempu ne’e, Amu Manuel hela iha komunidade CPN nu’udar konfesór, mestre ba Irmaun SDB sira lian-inglés no lia-latín, aleinde tradusaun ba dokumentu sira Kongregasaun no Bíblia nian.

Lia-menon ida ba amlulik sira ne’ebé padre Manuel husik mak ne’e: “Se imi fiél no persevera hanesan ha’u, imi mós sei haksolok atu selebra tinan 50 hanesan ha’u”.

Parabéns Amu, no obrigada ba ita-nia ministériu saserdotál. Mai ami FMA ba ita-nia ministériu iha Sakramentu sira Eukaristia no Rekonsiliasaun nian. Ita-nia moris sai tuir duni ita-nia lema ordenasaun nian: “Ha’u-nia moris ba imi, ema kiak no maksalak sira, hamutuk ho Jezús”.

Dala ida tan parabéns no Na’i haraik bensan ba ita-nia mehi sira!

(JG )