Dili – Iha loron 13 Fevereiru, iha Komunidade São José-Noviciado Komoro-Dili Madre sira ho ksolok no entuziasmo simu menina na’in Lima mai halo enkontru voluntariada ho Me. Esmeralda no hasoru malu ho Madre Inspetora atu fahe sira ba komunidade sira. Sira mak:  Ana F.Tavares husi Laga, Geovania J. da Costa husi Baucau, Francelina M. Nunes husi Maliana, Cerena P. V. C. dos Santos husi Dili/Ermera no Abelina de Jesus husi Aileu.

Enkontru ne’e hahú ho orasaun atu husu Maromak nia tulun no grasa ba sira atu sira sai no atu Maromak de’it mak hatudu ba sira dalan loos ne’ebé sira sei tuir no sira buka halo tuir Maromak Nia hakarak iha sira ida-idak nia moris loroloron nian. Sira sei halo esperiénsia rasik hodi deside atu tuir Jesus iha kongregasaun Salesiana.

Madre Inspetora, Me. Alma mos hato’o lia fuan Benvinda nian ba sira. Me. Alma dehan: “Ha’u haksolok ho imi nia prezensa, momentu ida ne’e importante tebes ba imi na’in 5 atu halo esperiénsia ho Madre Salesiana sira iha fatin ne’ebé sira sei haruka imi ba. Ha’u espera liu husi esperiénsia voluntária, tulun imi atu koñese liután Madre Salesiana sira nia misaun. Momentu voluntária bele sai mós hanesan test atu bele hare didi’ak imi. Se imi halo esperiénsia didi’ak imi sei kontinua imi nia dalan hodi hatene liután Kongregasaun nia misaun iha futuru. Ami reza ba imi atu hatan ho aten-brani no halo esperiénsia di’ak iha imi nia moris. Bem-vinda e korajen.”

Hafoin sira prienxe formuláriu no ba halo esperiénsia iha komunidade sira. Ita reza ba sira nain lima. Ita fiar katak iha loron komemorasaun ba Madre Mazzarello ne’e, Madre Mazzarello sei harohan no akompaña sira atu deskobre liután Maromak Nia hakaran ba sira.

(Noemia de Deus, FMA)