Dili – Ohin, iha salaun Canossa Becora-Dili, loron 13 fevereiru 2021, irmán juniores inter-kongregasaun sira ne’ebé profesa husi tinan 1 to’o tinan 3, tuir formasaun kona-ba meius komunikasaun nian.

Padre Venancio Pereira SJ mak sai Oradór ba formasaun ne’e, ho tema oinsá uza Komunikasaun iha moris konsagrada. Iha buat barak ne’ebé Padre aprezenta, maibé iha pontu rua ne’ebé importante tebes. Ida: saida mak komunikasaun nia konseitu? Katak meius ka ponte ida ne’ebé ema hato’o ka komunika mensajen ba malu. Iha mós sentidu lima kona-ba maneira de komunikasaun nian hanesan: Matan, tilun, ibun, inus no isin kulit. Ibun nia sentidu atu koalia ka hato’o buat ne’ebé diak no lós, tilun atu rona maibé dala barak ema la fo importansia nune’e komunikasaun la klaru no isin kulit atu sente buat ne’ebé komunika husi ibun, nst…

Rua: oinsá uza meius komunikasaun iha vida relijiosa? iha ninia vantazen no desvantazen, Komunikasaun nia vantajen; uza atu halo Evanjelizasaun, hala’o apostulado, assesu ba informasaun oi-oin, fasilita atu komunika ba malu no hatene saida mak akontese iha sosiedade, Kreda no mundu. No ninia desvantajen; fo importansia liu ba telefone duke irmán maluk sira ne’ebé hela hamutuk iha komunidade, uza facebook to’o kalan bo’ot ikus mai tarde iha tempu orasaun no missa, moris komunidade sai malirin, lakon sentidu nu’udar vida konsagrada no sai atan ba telefone tanba de’it la disiplina an, ikus mai lakon ninia vokasaun rasik. Nune’e liu husi formasaun ida ne’e tulun ami atu hatene uza meius komunikasaun ho konsiente no responsavel ba ami nia moris tan Kristu.

(Teresa de Carvalho, FMA)