Ohin Kreda hanoin aparisaun famoza mariana ida, akontese iha Lourdes, aldeia ida iha Pirenéus (foho sira Fransa nian) nia hun, iha loron 11 Fevereiru 1858. Menina ho tinan 14, Bernadette Soubirous, bá iha gruta eh fatuk-kuak Massabielle iha mota Gave nia ninin atu hili ai-sunu, no derepente nia sente anin maka’as no haree iha fatuk-kuak nia divizaun, figura feto ida nabilan ne’ebé ho hamnasa-midar konvida nia atu hakbesisk.

Aparisaun ne’ebé repete ba dala sanulu-resin-hitu no iha loron 25 Marsu feto ne’e deklara: «Ha’u mak Imakulada Konseisaun», no fó orden atu hari’i iha fatin ne’e santuáriu ida. Tinan haat antes, Papa Pio IV, iha loron 8 Dezembru proklama tiha ona dogma Imakulada Konseisaun nian.

Maski nune’e, autoridade ekleziástika la foti ho seriedade Bernadette ninia istória, enkuantu ambiente anti-klerikál sira haree ho ironia faktu ida-ne’e. Maibé, hahú atu akontese milagre dahuluk sira ne’ebé konvinse ema lubun-boot ba beibeik atu bá iha Massabielle: hodi fase an iha bee-matan ida mosu ho modu milagrozu iha fatuk-kuak eh gruta nia laran, traballadór lokál fatuk-kuak sira nian, ne’ebé lakon matan ida depoizde mina nakfera, derepente bele haree filafali, enkuantu feto ida ne’ebé tau nia kosok-oan ne’ebé médiku sira dehan atu mate ona, foti sai nia oan husi bee nia oan hetan fali saude di’ak. Iha aparisaun penúltima, sasin sira ne’ebé prezente iha ne’ebá, entre sira-ne’e, médiku ida, haree lilin lakan iha vidente Bernadette nia liman fuan sira leet, maibé iha éstaze, Bernadette lambe nia liman-fuan sira hodi la sunu.

Iha 18 Janeiru 1862 mons. Laurence, bispu Tarbes nian, rekoñese katak Virjen Maria mosu tebes duni ba Soubirous. Bernardette Soubirous, iha 1865 tama iha Irmán sira Instrusaun Kristán nian iha Nevers, no mate iha-ne’ebá iha 1879. Pio XI kanoniza nia iha  8 Dezembru 1933. Ho tempu, Lourdes sai fatin ba peregrinasaun sira,, ba orasaun sira no fatin peniténsia ba sala-na’in sira-nia konversaun. Leão XIII fó lisensa iha fatin ne’e selebrasaun litúrjika ofisiál ne’ebé Saun Pio Pio X habelar ba Kreda latina tomak iha 1907.

LORON 11 FEVEREIRU MAK LORON MUNDIÁL EMA-MORAS SIRA-NIAN. MAI ITA HAROHAN BA MALUK HOTU NE’EBÉ MORAS TAN PANDEMIA VIRUS CORONA NO MORAS SELUK NE’EBÉ AFETA EMA KIAK SIRA NO EMA IDA LA IHA INTERESE ATU TAU MATAN NO KURA SIRA.