Dili/Comoro (Timor-Leste) – Enkontru interámbitu ne’ebé hala’o ohin, 28 Jullu 2012, iha objetivu rua: objetivu dahuluk avalia no haree hamutuk fali atividade sira ne’ebé Ambitu ida-idak programa no organiza ona, no objetivu daruak, husi avaliasaun ida ne’e ambitu ida-idak buka atu halo di’ak liután programasaun sira ne’ebé seidauk hala’o/realiza.

Iha momentu hanesan ir. Alma Castagna, FMA, aprezenta mós “Projetu Edukativu Inspetoriál Pastorál Juveníl nian” no husu mós ba ámbitu ida-idak atu lee no fó ninia kontribuisaun ba projetu ne’e. Nia husu atu komunidade ida-idak haree no avalia, hodi haree se falta buat ruma ka se iha buat ruma atu korrije.

(Atu kontinua bele download iha okos).

 

APREZENTASAUN PROJETU EDUKATIVU

“Pastorál Juveníl iha Institutu FMA mak asaun konkretu misaun edukativa nian. Ida ne’e mak ita-nia modun tipiku atu esprime Kreda nia atensaun ba jerasaun foin-sa’e, hala’o iha espasu no tempu ida. Nia finalidade mak ema nia dezenvolvimentu integrál no eduka ba empeñu sidadania ida ne’ebé ativa” (LOME n. 4).

Konvensida kona-ba ita-nia misaun ida-ne’e, Institutu husu ba Inspetoria ida-idak atu elabora Projetu Pastorál lokál. Nune’e iha ita-nia Inspetoria ita hala’o serbisu pastorál ida hodi husu ba komunidade ida-idak atu lee sira-nia situasaun lokál no halo sira-nia vizaun, misaun no estratejía sira. Husi dadus komunidade ida-idak nian mak Inspetoria elabora Projetu Inspetoria nian. Nune’e ekipa pastorál prepara “draft”/esbosu ida ne’e baseia ba dadus sira Inspetoria nian. Oras ne’e ami husu ba ambitu ida-idak atu lee no fó ninia kontribuisaun ba Projetu Edukativu Pastorál Juveníl nian, no tuir mai ba komunidade edukativa ida-idak atu haree se Projetu ida ne’e bele hatán ba sira-nia atividade edukativa. Ami fiar katak Projetu ne’ebé sei elabora, bele fasilita sujeitu pastorál hotu iha fatin no situasaun konkretu ne’ebé sira enfrenta.

Download draft Projetu Edukativu Inspetoria TIN nian