FESTA APREZENTASAUN NA’I NIAN

Iha loron “Vida Konsagrada” nian, liturjia selebra “Aprezentasaun Na’i nian” iha Templu Jerusalém. Íkone/ilas ne’e – ne’ebé espresa entrega totál Kristu nian iha Aman nia liman, husi primeiru momentu ninia ezisténsia iha rai – konvida ema konsagradu/konsagrada hotu atu hafoun sira nia entrega an ba Maromak no halo sira-nia ezisténsia don ida domin nian, sasin ba realidade Reinu nian, ba servisu projetu salvasaun Maromak nian ba ema sira no ba mundu.

LEITURA I – Malaquias 3, 1-4 

Mensajeiru/maun-ain anónimu ida haklaken “Na’i nia Loron” – loron ne’ebé Maromak tuun mai hasoru nia Povu atu kria realidade foun. Iha loron ne’e, Jahwéh sei halakon egoízmu no salan, sei hamoos nia Povu nia fuan, sei inaugura tempu foun komuñaun loos nian entre Maromak no ema sira.

Vida Konsagrada mak interpelasaun profétika ida; interpela/sadik/sadik ema sira, konvida sira ba konversaun, haklaken no fó sasin kona-ba mundu ne’ebé sei mai.

LEITURA II – Hebreus 2, 14-18 

Testu aprezenta Jezús nu’udar amululik boot liu ne’ebé, hodi oferese nia moris nu’udar sakrifísiu ba Aman Maromak atu realiza planu salvasaun, nia hamoris Ema Foun, livre husi moris-atan iha salan, promove kategoria “Maromak nia oan”. Leitura ne’e, konvida eskolante sira atu hateke ba Jezús nia krús, atu interioriza ninia signifikadu, atu tuir Jezús iha don totál moris nian, iha entrega radikál, iha servisu simples no haraik an ba maun-alin sira.

Vida Konsagrada mak forma privilejiada atu moris no fó sasin kona-ba realidade ne’e.

EVANJELLU – Lucas 2, 22-40 

Liuhusi evanjelista Lucas nia liafuan sira no ninia katekeze, ita bele haree iha ne’e kuadru “Aprezentasaun Jezús nian” iha Templu Jerusalém, nu’udar momentu “konsagrasaun” ba Na’i.

Kristu nia konsagrasaun fó hanoin mai ita katak ita-nia moris tenke kumpre iha “ha’u mai”, iha entrega totál iha Aman nia liman, hodi serví Maromak nia projetu salvasaun ba ema sira no ba mundu.

 

Interpelasaun mai ita, ohin

Festa “Aprezentasaun Na’i nian” koinside ho selebrasaun Loron Vida Konsagrada nian. Hodi hateke ba mistériu konsagrasaun nian ne’ebé esprime iha ne’e, konsagradu sira haree fali fundamentu ba sira-nia konsagrasaun, hodi moris tuir Jezús, tan domin ba Reinu.

Ita bele dehan katak ohin Igreja tomak selebra “ofertóriu” ida oinseluk liu, iha ne’ebé ema konsagrada/u sira, mane no feto, renova ho modu espirituál sira nia saran an ba Maromak. Hodi halo nune’e, sira tulun komunidade ekleziál sira atu buras iha dimensaun saran an nian, edifika no estimula sarani sira atu fó sasin kona-ba Jezús iha dalan sira mundu nian.

Aprezentasaun Na’i nian iha Templu Jerusalém revela katak, husi inísiu Ninia dalan iha ema sira nia leet, Jezús hili dalan ida fidelidade totál nian ba Aman nia ukun-fuan no ninia projetu sira. Nia saran An, hodi konsagra An ba Aman manifesta iha disponibilidade atu kumpre ho modu fiél no inkondisionál Aman nia planu salvasaun to’o konsekuénsia ikus, to’o saran An totál ba ema sira.

Jezús nina “ecce venio”/ “Ha’u mai” mak modelu doasaun no entrega an ema konsagradu/a hotu nian, ne’ebé simu bolun atu tuir Jezús besik liután, iha oblasaun totál ba Maromak no ba Reinu. Vokasaun ema konsagrada/u sira nian konkretiza iha saran moris tomak iha Aman nia liman, iha fidelidade absoluta ba Ninia vontade no Ninia planu sira.

Simeão no Ana ne’ebé Evanjellu ohin haktuir mak figura kona-ba Israel fiél ne’ebé prepara an atu hein Mesias no aprezenta ho modu formál Mesias ne’e ba mundu. Bainhira Jezús mosu sira matan-moris atu rekoñese iha kosok-oan, Mesias libertadór ne’ebé ema hotu hein.

Ema konsagradu/a sira – dixípulu sira ne’ebé simu Jezús nu’udar roman no aseita atu tuir Nia – iha responsabilidade atu aprezenta Nia ba mundu no halo Nia sai proposta ne’ebé kestiona ema nia moris, liberta, haroman, salva sira.

Vida Konsagrada simu bolun atu reflete ho maneira partikulár Kristu nia roman. Ema tenke haree iha ema konsagradu/a sira, ne’ebé moris tuir estilu “Rahun Di’ak” nian, “fermentu” esperansa nian ba umanidade, “masin” ne’ebé fó sabór ba mundu, “naroman” ida ne’ebé lakan iha nakukun mundu nian no hatudu dalan loos no liberdade nian, “odamatan” nakloke ba Maromak nia Reinu no ba “lalehan foun no rai foun” ne’ebé Maromak hakarak aprezenta ba umanidade.

Konsagradu sira tenke sai naroman no konfortu ba ema hotu, lilin ne’ebé lakan ho domin ba Kristu, naroman ne’ebé leno nakukun sira mundu nian no profetikamente haklaken kona-ba realidade foun ne’ebé mosu daudaun.

Pobreza, kastidade no obediénsia mak karakterístika ema sira ne’ebé Maromak so’i ona, ne’ebé Maromak hasai husi moris-atan egoízmu nian.

Livre atu hadomi, livre atu serví: ne’e mak ema sira ne’ebé hakribi an rasik ba Reinu Lalehan. Hodi tuir Kristu, hedi iha krús no moris-hi’as, ema konsagradu/a sira asume maun-alin sira nia naha espirituál no materiál.