Venilale 31 Janeiru. Ohin familia Salesiana iha mundu tomak selebra festa Aman doben no Fundadór Sao Joao Bosco nian ba dala 133 ( 1888-2021), husik mundu ba Aman lalehan nia uman.

Nune’e mós kolejiu Madre Mazzarello Venilale hamutuk ho irmán sira komunidade nian selebra Aman, Mestre no Belun foinsa’e sira nian liuhusi atividade oioin. Festa ne’e hahu ho Novena  durante loron 9 iha parokia, hamutuk ho familia Salesiana no seminarista sira. Hafoin iha loron 30 selebra ho solenemente festa fundadór  nian iha parokia ho povu no estudante sira husi eskola 6 ne’ebé eziste iha Venilale. Iha Eukaristia Santa, Amu selebrante hateten katak; Don Bosco mak ema ne’ebé moris tuir Jezús nia hanorin iha Evanjellu ne’ebé dehan; “ Ema se halo an kiik hanesan labarik sira sei tama iha reinu lalehan”. Don Bosco hasoru susar no terus,  duun matak nia, maske nune’e nia nonok deit. Saran an ba labarik no faoinsae sira, tanba ne’e Maromak hamutuk ho nia no halo nia santu. Tan ida ne’e mak sai Aman, Mestre no Belun ba foinsae sira.

Hotu tiha misa, estudante ETV sira hotu selebra festa ne’e liuhusi knananuk no animasaun iha eskola to’o oras meudia. Hafoin iha loraik, menina kolejiu hala’o sertamen konaba Don Bosco nia moris, ba kada klase no ikus liu sai manan na’in/primeiru lugar mai husi Tékniku Hotelaria 2. Iha kalan kontinua festa ida ne’e hodi hare film Don Bosco nian. Estudante primeiru Anu no Segundu Anu sira ne’ebé la mai husi ambiente Salesiana sente haksolok tebes ho film ne’e, basá  ba dala uluk hare film  Don Bosco nian.

Iha loron tuir mai 31, maske nu’udar parókiana selebra festa ne’e iha loron 30, maibe irmán sira komunidade nian hamutuk ho menina koléjiu selebra festa ne’e iha 31. Tan ne’e iha oras 16:00, kada Asosiasaun aprezenta drama konaba Don Bosco nia moris bazeia ba tópiku ne’ebé hetan. Iha aprezentasaun drama ne’e, prezensa mós Amu Pároku Pe. Carlos Fernandes SDB.

Molok aprezenta drama, Irmán Diretora komunidade nian Ir. Carolina Maria Correia FMA, husu atu drama ne’ebé kada grupu sei aprezenta, ema idaidak foti fraze Don Bosco nian, nu’udar Don Bosco nia liamenon no tempu hanesan sai empeñu ida ba ema idaidak atu bele moris tuir.

 Grupu Animadores aprezenta konaba Mama Margarida nia moris, grupu Cimatti konaba Mehi Tinan 9, grupu Laudato Sii konaba Hasoru malu ho Bartolomeu Garelli, Marianu konaba Asu Pardo,  Don Bosco konaba Enkontru dahuluk Maria Doménica ho Don Bosco no Madre Mazzarello konaba Harii Institutu Filhas de Maria Auxiliadora.

Ikus liu Amu Pároku fó lia menon katak; aprezentasaun maske simples maibé sente emosaun tebes basá drama idaidak koalia kona-ba buat ne’ebé Don Bosco esperiénsia iha nia moris hamutuk ho Madre Mazzarello. Hafoin hatutan tan katak ho razaun 3 selebra festa ida ne’e; dahuluk konaba Don Bosco nia enkontru ho Amu ne’ebé dala barak la fó importansia ba foinsae sira nune’e nia promete katak bainhira sai padre taumatan ba foinsae sira. Hafoin ho S. Agostinho nia liafuan ne’ebé dehan:” Solo Per Amore” Tan Domin”. Daruak, tan Domin ne’e mak Don Bosco halo buat hotu no sei kiik kedas nia iha domin ba foinsae sira. Tan domin ba Maromak no domin ba foinsa’e sira Maromak hamutuk ho nia halo buat hirak ne’e.  Datoluk mak Don Bosco nia enkontru ho foinsa’e sira mak grasa ida no ohin Don Bosco moris no prezente iha dadaun imi leet agora iha Salesianu no Salesianu nia moris no iha Salesianu no Salesiana sira nia edukasaun. Tan ne’e mai iha kolejiu mak grasa ida. Basá ema ne’ebé enkontru ho Don Bosco nunka falha. Husi festa ne’e Don Bosco hanorin buat tolu :  serbisu, orasaun no estuda.

Objetivu husi festa ne’e, mak nu’udar dalan ida atu eduka foinsa’e sira atu hatene haree Maromak nia oin no  Nia liman fatin iha santu/a liuliu fundador sira nia moris. Alende ne’e, sai mós momentu ksolok no amizade nian hodi hatudu sira nia talentu iha atividade sira ne’ebé hala’o nu’udar familia ida iha tradisaun Salesiana.

(Alice Filipe)