Dili – Hodi hanoin festa Don Bosco nian aban, ohin loron 30 janeiro 2021 professores no estudante sira Maria Auxiliadora nian selebra ona festa Don Bosco nian. Hodi hahu ho selebrasaun Eukaristia ne’ebe preside husi Padre Agostinho SDB no iha ninia omilia hahu ho perguntas ida: sé mak Don Bosco? Estudante sira hatan; DB mak aman, mestre no belun ba foin-sa’e sira. Hafoin kontinuasaun omilia DB mos ema kiak, sei kiik nia aman mate ona no hela ho nia mama Margarida. Iha nia moris nia mama hanorin nia kumprimenta Nain Feto loron ida dala-3. Nune’e husi Na’i-Feto nia aprende hadomi Maromak no maluk sira, tan ne’e ba DB buat ne’ebe importante mak halo belun ho Jesus no Maria no mos halo didi’ak ita nia obrigasaun hanesan estuda, tulun inan aman no badinas ba misa atu sai belun ho Jesus liu husi nia Liafuan no Nia Isin ne’ebe ita simu. Halo belun ho Jesus no Maria buka hadook-an husi sala hodi halo buat ne’ebe kiik bele lori ita to’o dalan santidade nian. Tan ne’e kumpri didi’ak obrigasaun iha uma tulun inan-aman, estuda atu aban bainrua sai uluk ema ne’ebe di’ak, iha família no sai sidadaun ne’ebe onestu iha sosiedade. Ne’e mak mensajen husi Padre nia omilia.

Molok jogus iha mensajen mos husi Madre Jacinta ba estudante sira katak, Don Bosco hadomi liu foin-sa’e sira” “ha’u nia doben foin-sa’e no labarik sira ha’u hakarak imi haksolok iha rai no iha lalehan” nune’e Don Bosco hakarak ita haksolok iha rai no tenke haksolok mos iha lalehan no nia fó segredu atu bele ba to’o iha lalehan mak halo buat hotu-hotu tuir nia tempu maibé halo ho di’ak liu hanesan iha eskola no wainhira tuir misa reza ho didi’ak. Nune’e dalan atu ba Lalehan fasil liu importante mak halo didi’ak ita nia dever iha moris lorloron nian, ne’e mak dalan santidade nian.

Hafoin kontinua ho jogus oi-oin tuir klase ida-idak nian no jogus ne’e sai mos nu’udar jogus amizade no ksolok nian, tanba husi jogus mak fahe ksolok no domin ba malu nu’udar Jesus no Maria nia belun sira. Atu taka atividade ksolok nian ba festa ida ne’e, hodi hananu hamutuk kanta Auxiliadora nian nu’udar Orasaun ikus atu agradese Maromak ba loron kmanek ida ne’e.

(Onesiana-Ivonia FMA)