Dili – Domingo, 10 de Janeiro 2021, iha Escola 1⁰ no 2⁰ Ciclo Maria Auxiliadora, Comoro, antigos alunos hotu husi eskola refere hahuu husi 1999 to’o 2020 hamutuk 181 hala’o sorumutu hamutuk ba dahuluk. Sorumutu ne’ebé hala’o ho objetivo ‘atu hatene prezensa antigos alunos sira nian no mós oinsa atu bele harii Estrutura antigos alunos nian’. Sorumutu refere loke ho orasaun hahuu nian ne’ebé dirije husi Me. Zelia Matos Lemos, FMA, nu’udar coordenadora ba antigos alunos Escola Maria Auxiliadora nian. Hafoin de ne’e, antigos alunos sira ba rona liafuan murak bemvinda nian ne’ebé hatoo husi Madre Superiora komunidade B. Eusebia Palomino nian Me. Jacinta Gusmão, FMA. Iha nia diskursu, madre koalia kona ba obra Dom Bosco nian no oinsa iha tinan 1976 Dom Bosco koalia ona kona ba importansia harii organizasaun ba antigos alunos FMA nian, “Loron ida sei mosu forsa boot ida maibé seidauk agora”, Dom Bosco dehan ne’e iha nia livro memoria grafica nian. No mehi ne’ebé Dom Bosco iha hetan realizasaun husi Dom Beato Filipe Rinaldi hamutuk ho Madre ida FMA nian Me. Caterina hodi hahuu harii grupu ba Antigos Alunos Escola FMA nian. Madre Superiora mos hatutan tan katak nia haree antigos alunos MA nian ne’ebé marka prezensa iha lokraik ne’ebá nuudar tropa ka forsa boot ida Dom Bosco no Madre Mazzarello nian ne’ebé sei haklaken fali Karisma Salesiano nian iha fatin ne’ebé sira hela ba. Antigu/a aluna mak forsa profesia nian, masin no roman ba sosiedade ohin loron nian.

Tuir ne’e, kontinua kedas ho sesaun ‘konhese malu no partilha’ nian iha ne’ebé antigos alunos ida-idak husi tinan 1999 too graduante 2020 nian aprezenta sira nia aan no fahe kona-ba saida mak sira halo dau-daun. Iha sesaun refere, bele haree katak antigos alunos barak mak kontinua sira nia estudu iha universidade balun iha Dili laran, seluk fali hetan bolso estudu no kontinua sira nia estudu iha nasaun seluk hanesan Australia, America, Filipina, Indonesia, India no Noza Zelandia. Laos ne’e deit maibé iha mos antigos alunos sira balun ne’ebé agora daudaun servisu hela iha NGO sira, iha empresa lokal sira inklui harii negosiu balun rasik.

Hafoin ne’e Madre Kordenadora hatoo mensajein importante ida ba antigos alunos hotu hodi bele lori hamutuk ho sira mak “ Bainhira tama ona iha portaun eskola nian, ita hotu sai familia”.

Molok remata sorumutu ba ohin loron, antigos alunos sira deside loron ida atu bele halao enkontru ba daruak hodi bele harii estrutura antigos alunos nian no hahuu halo plano bai ha organizasaun ne’e. No sorumutu refere remata ho orasaun no hasai fotografia hamutuk ho belun sira.

(Vitória Belo)