Cassa/Ainaro – Ohin, 9 Janeiru 2021, hahú loron dahuluk prezensa iha misaun Cassa (Ainaro). Me. Alma Castagna, nu’udar Inspetora, akompaña Irmán nain 2, Ir Sebastiana Costa no Ir Ana Rosalia ne’ebé sei hela iha Cassa, maski hola parte ba komunidade S. José, Dili.

Prezensa iha Cassa tanba pedidu husi Bispu Dioseze Dili, D. Virgílio do Carmo da Silva SDB,  haree ba nesesidade misaun ne’ebá nian ne’ebé la iha prezensa ida kongregasaun ruma no mós amlulik ida. Iha 25 Novembru 2016, Ir Alma, inspetora FMA TIN ba haree fatin ne’e no husi ne’e, Irmán sira hahú bá halo apostoladu durante tempu forte sira hodi prepara sarani sira ba loron boot litúrjiku Páskua no Natál. Baibain komunidade S. J.Bosco-Balide no komunidade Eusebia Palomino-Comoro, hamutuk ho formande balun mak bá halo apostoladu.

Iha tinan ne’e, iha 25 Novembru, Irmán Provinsiál, no nia ekipe ba haree fali fatin, tanba hetan ona autorizasaun husi Roma atu hahú prezensa foun. Iha loron  ne’ebá, Pároku no inan-aman balun  no estudente sira fó benvinda ba Madre sira. Agradese tebes Pároku Ainaro, Padre Armindo ne’ebé nafatin akompaña preparasaun no fó apoiu hotu atu Irmán sira bele hela iha Cassa.

No ohin, ho ofisiál hahú “prezensa” ne’e. Ir Alma Castagna, Ir Sebastiana Costa no Ir Ana Rosalia hetan surpreza, bainhira too iha uma Cassa, iha pe. Pároku pe. Armindo ho badaen sira sei hadi’ak hela uma. Maromak Laran-Di’ak tebes hatudu husi  ema laran-luak barak ne’ebé tulun atu fatin prontu  ba Irmán sira. Ir Sebastiana no Ir Ana Ros’alia agradese tebes ba apoiu hotu, husi Inspetoria tomak mós.

(Comsoc FMA TIN)