Dili – Ohin 5 Janeiro mak loron furak no ksolok bo’ot ba Irman FMA sira iha Ispetoria TIN, liu-liu Irmán FMA no Novisa sira iha Uma Novisiadu Komoro-Dili ne’ebe ho entiziasmo hato’o “Bem-vinda” ba foinsa’e nain rua; Post. Inocensia dos Santos no Post. Novia Lestari Daeli ne’ebe ho korajen no laran metin ba Jasus ne’ebe bolu sira no Maria Auxiliadora ne’ebe nafatin gia no akompaña sira hodi halo tan ain hakat ida iha dalan vokasaun nian.

Wainhira sira to’o iha uma Novisiadu ne’ebe akompaña husi Madre Diretora Komundade Balide no Madre Asistente Postulante nian, Irmán sira simu ho knananuk “Ita Hotu Familia Ida” no lia fuan Bem-vinda nia husi Madre Maestra. Madre dehan: “Ami haksolok tebes ho Irmán Postulante nain rua nia prezensa ne’ebe ho aten brani hatan ba Maromak Nia bolu hodi halo tan ain hakat ida iha dalan formasaun nian. Mai ita lao hamutuk atu buka no deskobre liu tan diak no kmanek hotu ne’ebe Nai prepara hela mai ita hodi forma-an diak liu tan ba tuir Kristu besik liu tan. Bem-vinda. Hotu tiha hotu-hotu ba Kapela atu saran Irmán Postulante nain rua ba Maria Auxiliadora atu akompaña no gia sira lor-loron atu hatan ho ksolok no domin ba bolun Santu ne’e. Hafoin kontinua kedas ho lori sira ba  koñese fatin ida –idak. Irmán Novisa sira prepara ona vitamin ba Irmán nain rua atu konsumo iha fatin sira hanesan: iha Kapela, vitamin mak “reza ho fuan no laran ba! Jesus rona ó” no “Ita nia orasaun sira hotu Jesus nafatin rona, keta baruk atu vizita Nia”. Iha Refetorio, vitamin mak “refetorio mak fatin atu fahe ksolok, koalia ba, iha Irmán sira ne’ebe pronto rona ó” no “han ho hakmatek no ksolok, atu hetan forsa ba isin hodi estuda no servisu ba Nai Nia reino. Iha Dormitório, vitamin mak “toba ho hakmatek ba atu aban bele hetan forsa” no “respeita Irmán sira seluk ne’ebe deskansa ona. Silensiu”. Ho vitamin sira ne’e sei halo Irmán nain rua sai saudavel liu tan iha tempo no espasu hirak ne’e ba sira nia formasaun.

Dala ida tan ami hato’o Bem-vinda ka Mai liu iha ita nia uma domin Maromak nian ne’e. Ita Fiar katak ita nia Padroiru uma nian “São José sei proteje no tulun ita. Maria Auxiliadora ita Inan doben sei taka ita ho nia Manta”. Keta tauk. Nia ne’ebe bolu imi sei la husik imi. Fiar-an lao ba oin. Mai ita reza ba Irmán Postulante nain rua, basá hahu ohin sira halo sira nia retiru atu tama Novisiadu.

(Noemia de Deus, FMA)