Dili – Loron 27 Dezembro mak loron Solenidade Sagrada Familia nian. Iha Komunidade S. José-Noviciado Komoro Dili, selebra Festa Natal hamutuk ho Irmán FMA sira no Irmán Noviça sira ne’ebe hola parte iha komunidade ne’e nia familia. Hahu ho Konferensia kona ba Karta Apostólica Patris Cordis husi Papa Francisco iha okaziaun atu selebra tina 150⁰ deklarasaun Saun Jose nu’udar Padroeiro Universal da Igreja. Hafoin kontinua ho selebrasaun Eukaristia, han hamutuk, fahe ksolok iha animasaun no jogos animadu ba kada grupo tuir idade no ikus merkadu baratu ba familia sira.

Nune’e iha Pe. Agostinho nia konferensia, Padre koalia kona ba se mak Saun Jose no nia misaun. Padre dehan tuir Amo Papa sira, Saun Jose mos nu’udar Padroeiro ba Igreja Katólika, Padroeiro ba Operario sira, Guadiaun redentor  nian no Padroeiro ba Mate diak (boa morte). Tuir Evanjellu rua Saun Mateus no Saun Lukas hateten: ‘Saun Jose mak karpintero ida ne’ebe haraik-an, mane ida ne’ebe kaben ho Maria Jesus Nia Inan, Ema ida ne’ebe Justo, ida ne’ebe pronto halo tuir Maromak Nia hakarak ne’ebe hatudu iha nia lei liu husi mehi dala hat, iha viajen naruk no kole husi Nazare ba Belem, hare Mesias moris iha balada han fatin “tamba laiha fatin oan ida ba sira” iha rai seluk no nia mak ida ne’ebe hare adorasaun husi bibi atan sira no Magos sira ne’ebe reprezenta povo Israel no povo jentiu sira. Ema hotu bele hare iha Saun Jose nu’udar aman ne’ebe ema hadomi, Aman ternura, aman obedente, aman ne’ebe hatene simu, aman ne’ebe ho korajen kriativa, aman servisu nain, aman ne’ebe hela iha kotuk ka hanesan lalatak, la hatudu-an. Iha Saun Jose ita hare nia ema ne’ebe sevisu nain, han ho nia kosar ben. Tau matandidiak baJesus no eduka Jesus iha moris infansia nian. Nia tau Maromak iha sentru moris nian, halo tuir buat hotu ne’ebe Maromak husu, tan ne’e iha Jesus Nia moris Jesus mos halo tuir ezemplu sira ne’e.Ida ne’e mak sai ezemplu diak mai ita atu banati tuir”. Iha selebrasaun Eukaristia Padre mensiona kona ba attitude seluk tan Saun Jose nian iha Sagrada Familia mak hanesan: ‘Nafatin laran metin iha Maromak, domin, pasiensia, sakrifisiu, solidaridade no silensiu’. Aman inan sira presiza attitude Saun Jose nian sira ne’e atu bele kria familia ida ne’ebe moris iha ármonia, domin, ksolok no unidade. Iha familia laran presiza fo tempo ba malu atu koalia ba malu, rona malu no fahe ba malu hanoin no sentimentu sira, nune’e bele kria familia ne’ebe komprende malu no iha unidade. Ita husu ba Sagrada Familia atu haraik mai ita grasa atu moris tuir Maromak Nia hakarak hanesan sira”.

Hotu tiha selebrasaun Eukaristia, Irman sira ho sira nia familia fahe ksolok iha han meio-dia hamutuk ne’ebe familia ida-idak lori, iha mos kantu no dansa sira ne’ebe prepara husi familia sira hodi halo kompletu festa hamutuk ida ne’e. irman sira mos prepara jogos animadu balu ne’ebe iha relasaun ho Padre nia konferensia no ikus taka ho merkadu baratu ne’ebe Irman sira prepara.

Domin Natal halibur ita hamutuk. Nakonu ho ksolok no domin Irman sira hato’o agradese wain  ba familia sira ne’ebe mai no suporta nafatin ami iha dalan vokasaun santa ida ne’e. Imi nia prezensa mak ami nia ksolok atu saran-an nafatin ba Nai moris ikus nian.

(Noemia de Deus FMA)