Dili – Ho Festa Sagrada Familia nian, komunidade S. João Bosco, Dili, halo festa hamutuk ho irman sira nia familia. Festa ida ne’e hahu  ho formasaun badak husi Madre diretora, Sr. Angelita ne’ebé fo ba inan-aman no Sr.Tania ba labarik sira.

Depois ida ne’e kontinua ho Selebrasaun Eukaristia ne’ebé dirije husi Pe.Manuel Pinto, SDB. Ksolok ba festa ne’e aumenta tanba hetan vizita husi Amu Arsebispu Dom Virgilio da Silva, SDB hamutuk ho Diakon Elio. Kontinua ho almoço, animasaun no komprimenta Natal nian husi irman sira ba familia.

Festa ida ne’e hetan mensajem barak ne’ebé apresenta husi familia ida-idak ninia entusiasmu no partisipasaun iha ninia lalaok hotu. Pe.Manuel iha nia homilia fo hanoin ba familia atu: “Kontinua hametin relasaun entre inan-aman no oan iha domin nia laran hanesan familia Nazare nian. Nune’e, ami mos ne’ebé harii familia nu’udar komunidade . Jesus mak sai sentru iha ita nia familia ida-idak.”

Familia nia suporta ba irman sira importante tebes, tan vokasaun nia abut mak husi familia nia akompañamentu. Nune’e, maski ami moris iha komunidade maibé domin metin nafatin. La hasoru bebeik, tanba  Jesus taka fatin iha ami nia fuan, nune’e iha festa hanesan ne’e mak “domin sai metin liutan.”

Boas Festa Natal  ba ita nia familia hotu.

(Post. Lestari)