Angelus ho Papa Francosco, 27 Dezembru 2020

 

Maun no biin-alin sira, bondia!

Liu de’it loron ruma husi Natál, liturjia konvida ita atu hateke ba Santa Família Jezús, Maria no José nian. Furak reflete kona-ba faktu katak Maromak nia oan hakarak iha nesesidade, hanesan labarik hotu, kona-ba domin família nian. Tanba ne’e, tanba Jezús nia família, ida Nazaré nian mak família-modelu, iha-ne’ebé família hotu mundu nian bele hetan sira-nia pontu referénsia seguru no inspirasaun segura. Iha Nazaré natubu primavera vida umana Maromak Oan nian, iha momentu hodi Espíritu Santu nia obra nia hola isin iha knotak virjen Maria nian. Iha baki-didin Uma Nazaré ne’ebé maksimun mak hala’o Jezús nia infánsia iha ksolok laran, ho Maria nia atensaun inan nian, no José nia kuidadu, iha ne’ebé Jezús bele haree Maromak nia ternura (kf Lett. apost. Patris corde, 2).

Hodi banati tuir Sagrada Família, ita simu bolun atu deskobre hikas valór edukativu núkleu família nian: nia husu atu hari’i iha domin ne’ebé hahoris filafali relasaun sira hodi loke ba orizonte esperansa nian. Iha família bele esperimenta komuñaun sinsera bainhira nia sai uma orasaun nian, bainhira afetu sira sériu, kle’an no puru, bainhira perdaun  manán diskórdia, bainhira dureza moris loroloron nian sai midar ho ternura resíproka no adezaun serena ba Maromak nia hakaran. Ho modu ne’e, família loke an ba ksolok ne’ebé Maromak haraik ba ema hotu ne’ebé hatene fó ho ksolok. Tempu hanesan, hetan enerjia espirituál atu loke an ba li’ur, ba ema seluk, ba servisu maun-alin sira-nian, ba kolaborasaun iha konstrusaun mundu ida ne’ebé foun nafatin no di’ak liután; nune’e bele sai maklorik estímulu pozitivu sira; família evanjeliza ho ezemplu moris nian. Loos duni katak, iha família ida-idak iha problema sira, no dalaruma haksesuk malu. “Padre, ha’u haksesuk malu…” – ita umanu, ita fraku, no ita hotu dalaruma iha realidade ida-ne’e katak haksesuk malu iha família. Ha’u dehan buat ida ba imi: se ita haksesuk iha família, loron keta remata hodi la hadame malu. “Loos, ha’u haksesuk”, maibe molok loron remata, halo dame. No hatene tan sá? Tanba funu malirin loron tuirmai nian ne’e perigozu liu. La tulun. No hafoin, iha família iha liafuan tolu, liafuan tolu ne’ebé presiza rai di’ak nafatin: “lisensa”, “obrigadu”, “deskulpa”. “Lisensa”, atu la sai intruzivu iha ema seluk nia vida. “Lisensa: ha’u bele halo buat ruma? Ó hanoin katak ha’u bele halo ida-ne’e?”. “Lisnesa”. Sempre, labele sai intruzivu. “Lisensa”, liafuan dahuluk. “Obrigadu”: tulun barak, servisu barak ne’ebé ita halo iha família. Agradese nafatin. Gratidaun mak klamar nobre nia raan. “Obrigadu”. No hafoin, ida difisil liu atu dehan: “Deskulpa”. Tanba ita nafatin halo buat aat no dalabrak ema ruma sente ofendidu ba buat ne’e. “Ha’u husu deskulpa”, “Ha’u husu deskulpa”. Imi keta haluha liafuan tolu ne’e: “lisensa”, “obrigadu”, “deskulpa”. Se iha família ida, iha ambeinte familiár ida iha liafuan tolu ne’e, família ne’e la’o di’ak.

Festa ohin nian. nu’udar ezemplu bolu ita atu evanjeliza ho família, hodi propoin fali ideál domin kaben-na’in nian no família nian, hanesan subliña iha Ezortasaun apostólika Amoris laetitia, ne’ebé sei selebra nia aniversáriu dalimak promulgasaun nian iha 19 Marsu mai. No sei sai tinan ida reflesaun nian kona-ba Amoris laetitia no sei iha oportunidade atu hakle’an konteúdu dokumentu nian [19 Marsu 2021-Juñu 2022].

Reflesaun sira-ne’e sei tau iha dispozisaun ba komunidade ekleziál sira no família sira, atu akompaña sira-nia dalan. Agora kedas ha’u konvida hotu-hotu atu adere ba inisiativa sira ne’ebé sei promove iha Tinan nia laran no sei koordena husi Dicastero per i Laici, la Famiglia e la Vita. Ita entrega ba Santa Família Nazaré nian, ho modu partikulár ba S. José espozu no aman nakonu ho atensaun. Dalan ho família sira mundu tomak nian ida-ne’e.

Atu Virjen Maria, ne’ebé oras ne’e ita dirije orasaun  Angelus nian, harohan daet ba família sira mundu tomak nian atu iha atrasaun ba beibeik ba ideál evanjéliku Santa Família nian, nune’e sai fermentu umanidade foun nian no solidariedade konkreta no universál nian.