Dili – Ho solenidade Sagrada Família nian, ohin, 27 Dezembru, ami Irmán sira iha komunidade Beata Eusebia-Comoro Dili, halo festa hamutuk ho família sira iha komunidade, hodi hametin no harii ami nia uniaun entre família sira. No hahu kedas ho selebrasaun Eukaristia iha kapela komunidade nian, ne’ebé preside husi Padre Nelson Gonçalves,SDB.

Iha Padre nia omilia ko’alia kona ba komparasaun entre vokasaun rua: família no relijiozu nian, katak moris família nafatin hasoru difikuldade no momentu difikuldade nian presiza hateke ba kotuk hodi hanoin fali sira nia prosesu domin nian (momentu namora) to’o sira harii família, hanesan mos vida relijioza bainhira hasoru difikuldade presiza hateke fali ba kotuk oinsá prosesu hahu vokasaun, hodi hanoin katak Maromak mak bolu ita tuir ita ida-idak nia vokasaun. Hanesan S. Paulo dehan, ita presiza kuda nafatin virtude sira; haraik-an, hadomi malu no pasiénsia, atu família bele fiél ba malu no sai ezemplar ba oan sira. Nune’e modelu família nian ne’ebé perfeitu mak sagrada família katak Nain Feto ho São Jose lori mos Jezús ba Templu bainhira Jezús sei kiik. Tan ne’e inan-aman sira iha dever atu lori oan sira ba kreda hodi fo valor ba moris Kristaun. Bainhira ema ida-idak hala’o didi’ak nia dever nu’udar oan no nu’udar inan-aman, sei hetan ksolok iha ne’eba no sei esperiénsia moris Lalehan nian iha família.

Depois de misa kontinua ami nia atividade sira hodi fahe domin no ksolok nu’udar família ida liu husi jogus balaun ba labarik sira, pasa bola ba foin-sa’e no ba família sira ho kriatividade hatudu prezepiu moris. Hafoin almosu hamutuk, hodi kontinua fali ho atraksi ne’ebé Irmán sira no família sira ida-idak prepara ona hodi kumprimenta malu ba festa Natal.

Obrigada barak ba família ida idak nia presenza tamba ita nia hamutuk mak forsa atu tulun malu sai fiel ba ida idak nia vokasaun. Vokasaun relijioza hetan fatin iha família laran, tamba ne’e família importante mai ami.

Molok fahe malu madre Superiora konvida atu entrega família ida idak iha Nai Feto nia portesaun no gia atu hamutuk ho Maria ita ba hasoru tinan foun ho fiar no esperansa nafatin.

Obrigada barak!

(Onesiana, FMA)