Dili – Iha Sábadu, 19 Dezembru, animadores hamutuk ho labarik no foinsa’e sira, akompaña husi Irman sira ne’ebé responsavel  ba “Oratóriu FMA Balide” hala’o paseiu iha sidade laran ba tasi Dolak oan. Objetivu husi paseiu ne’e mak atu taka tinan tuan 2020 nian, ba aktividades hotu ne’ebé hala’o durante tinan  ne’e. Movimento ne’e halo ami hotu sente haksolok tanba foin realiza paseiu hamutuk ne’ebé lolós akontese iha tempu Estadu Emerjénsia nian. Nune’e, hahu dader to’o lokraik, ami aproveita didi’ak atu sente  Maromak Nia Kriasaun no fahe  ami nia ksolok iha “Espíritu Família Salesiana” nian tuir Don Bosco no Madre Mazzarello.

La to’o iha paseiu de’it. Sentimentu gratidaun nian ne’e ami taka hodi halo Natal hamutuk ho família oratorianu hamutuk ho komunidade. “Titulu Festa” mak sai nu’udar tema ba eventu refere ho nia objetivu atu agradese ba Na’I Maromak ne’ebé durante ne’e akompaña aktividade oratóriu nian. Eventu ne’e hahu ho selebrasaun Eukaristia ne’ebé preside husi Pe. Acasio, SDB. Iha omilia Padre ko’alia kona ba oinsa ita nia preparasaun atu tama iha Festa Natal ne’ebé besik dadaun ona mai. Depois misa halo animasaun, jogus  ne’ebé inklui inan-aman.

Tuir mai, lia fuan badak husi Me. Angelita mak kona ba “Família ne’ebé atu hasoru Festa Natal ne’e, presiza hakerek surat ba malu atu hametin relasaun entre inan-aman no oan sira. Husu mos oratorianu ida-idak, atu sai oan ne’ebé di’ak no sai ezemplu ba ema seluk, ne’e mak nu’udar prezente bo’ot ida iha festa ne’ebé sei mai.” La haluha mos Madre konvida animadores no oratorianu sira “atu keta haluha hamnasa, atu mundu mos bele hamnasa.” Ami taka ho teatro ne’ebé kompostu husi kanta, dansa no drama hodi komprimenta inan-aman sira no merenda hamutuk.

Don Bosco dehan: “La to’o de’it atu hadomi foin-sa’e sira, maibé, halo sira sente katak ita hadomi sira.”

 

Boas Festas Natal no Ksolok Tinan Foun 2021

Oratorianu FMA Balide